Сталі вядомыя падрабязнасці трагічнай смерці 22-гадовага беларуса ў польскіх Татрах
З 4 ліпеня ў Польшчы вяліся пошукі беларуса Змітра Краўцова, на наступны дзень валанцёры паведамілі, што знайшлі цела хлопца без прыкмет жыцця.
Беларус Зміцер Краўцоў памёр, упаўшы са скалы ў польскіх Татрах. Горныя ратавальнікі расказалі падрабязнасці ягонай смерці, пра якую стала вядома 5 ліпеня, піша «Радыё Свабода».
Змітру Краўцову было 22 гады. Ён пераехаў у Польшчу нядаўна і пасяліўся ў Кракаве. Хлопец спрабаваў знайсці працу ў рэстараннай сферы.
У панядзелак, 3 ліпеня, Зміцер у адзіночку выправіўся ў горы. У апошняй размове з блізкімі ён назваў тры магчымыя маршруты, па якіх пойдзе. Свой выбар хлопец зрабіў пазней і нікому пра яго не паведаміў. Ён пакінуў машыну на турыстычным паркінгу і накіраваўся на гару Рысы (2501 метр), якая знаходзіцца на мяжы са Славакіяй, над самым папулярным турыстычным аб'ектам рэгіёна — возерам Марское Вока.
Калі да раніцы аўторка Зміцер так і не вярнуўся і нават не выйшаў на сувязь, ягоная знаёмая звязалася з экстраннымі службамі.
Татранская валанцёрская выратавальная служба атрымала паведамленне аб знікненні беларуса ў 9:30 і аператыўна пачала пошукі. Высветліўшы, што хлопец прыпаркаваўся ля пачатку маршруту на Марское Вока і гару Рысы, ратавальнікі сканцэнтравалі намаганні менавіта там. Задзейнічалі верталёт і дроны з камерамі.
Інтэнсіўныя пошукі скончыліся днём у сераду. Ратавальнікі знайшлі Змітра Краўцова нежывым на вышыні больш за 2000 метраў, побач з трасай падʼёму на гару Рысы, у раёне скальнага выступу Bula pod Rysami.
У гэтым месцы вельмі стромкі схіл, сарвацца з якога лёгка ў любую пару года, паслізнуўшыся на дробных камянях або мокрай ад дажджу скале. А цяпер на сцежцы, як пацвердзілі ў каментарах да публікацыі альпіністы, якія нядаўна праходзілі там, усё яшчэ застаецца абледзянелы снег, які робіць узыходжанне асабліва рызыкоўным.
«У выніку падзення з вышыні малады турыст атрымаў смяротныя пашкоджанні. Ратавальнікі верталётам транспартавалі цела ў Закапанэ», — паведамляе TORP.
***
Рысы — гэта самая высокая вяршыня Польшчы і самая небяспечная гара польскіх Татраў.
Са славацкага боку пад'ём на яе спадзісты і беспраблемны, а вось з польскага боку гара ўяўляе сабой амаль сцяну, і траса ўздыму на вяршыню там складаная і небяспечная, патрабуе спецыяльнага абсталявання і навыкаў.
Тым не менш яна вельмі папулярная, і перыядычна турысты там гінуць.
Каментары