Эндзі Бёрнэм абвешчаны новым лідарам Лейбарысцкай партыі і зойме пасаду прэм'ера Вялікабрытаніі
Бёрнэм змяняе на гэтай пасадзе Кіра Стармера, які нядаўна пайшоў у адстаўку.
Бёрнэм — мэр Вялікага Манчэстэра, яму 56 гадоў. Пасля заканчэння ўніверсітэта Бёрнэм працаваў дарадцам лейбарысцкіх палітыкаў, а таксама супрацоўнікам Нацыянальнай службы аховы здароўя. Калі ў 2001 годзе яго абралі ў Палату грамадаў ад акругі Лі ў Вялікім Манчэстэры, ён быў адным з многіх маладых дэпутатаў, якія прыйшлі ў парламент на хвалі папулярнасці Тоні Блэра.
У 2017 годзе ён пакінуў парламент і вылучыўся на пасаду першага мэра Вялікага Манчэстэра. У Вестмінстэры гэта выглядала як крок назад. Але сам Бёрнэм сцвярджаў, што будучыня брытанскай палітыкі залежыць не толькі ад Лондана, а ад таго, ці атрымаюць рэгіёны больш улады і фінансавых магчымасцяў.
На выбарах ён перамог з вялікім адрывам. Так пачаўся новы этап яго кар'еры.
На пасадзе мэра Бёрнэм зрабіў галоўнай тэмай развіццё паўночнай Англіі. Ён выступаў за перадачу паўнамоцтваў рэгіёнам, развіццё транспарту, будаўніцтва жылля і падтрымку бяздомных.
На пасадзе мэра Бёрнэм таксама ініцыяваў незалежныя расследаванні выпадкаў сэксуальнай эксплуатацыі дзяцей у Вялікім Манчэстэры. Іх вынікі выявілі сур'ёзныя пралікі ў працы паліцыі і сацыяльных службаў, якія на працягу гадоў не заўсёды належным чынам рэагавалі на паведамленні пра гвалт над непаўналетнімі.
Але сапраўдную нацыянальную вядомасць ён атрымаў у 2020 годзе.
Падчас пандэміі COVID-19 Бёрнэм уступіў у адкрыты канфлікт з кансерватыўным урадам Борыса Джонсана. Ён абвінавачваў цэнтральныя ўлады ў тым, што яны недастаткова падтрымліваюць паўночныя рэгіёны краіны і навязваюць ім рашэнні без уліку мясцовых патрэбаў.
Спрэчкі адбываліся ў жывым эфіры і прыцягвалі ўвагу ўсёй краіны. Для многіх жыхароў поўначы Бёрнэм стаў сімвалам супраціву лонданскаму цэнтру. Менавіта тады за ім замацавалася мянушка Кароль Поўначы.
Каментары