Пра тое, што ЗША прынялі рашэнне перадаць Украіне касетныя боепрыпасы, паведаміў дарадца прэзідэнта ЗША па нацыянальнай бяспецы Джэйк Саліван.
Саліван пры гэтым адзначыў, што Вашынгтон разумее рызыку, якую ўжыванне касетных снарадаў ва Украіне нясе для мірнага насельніцтва. Менавіта таму ЗША доўга адкладалі рашэнне аб іх перадачы, але, нарэшце, яго прынялі.
У Вашынгтоне пры гэтым падкрэслілі, што Украіна будзе выкарыстоўваць касетныя боепрыпасы толькі на сваёй тэрыторыі, мінімізуючы рызыку для ўласнага насельніцтва.
Пастаўка касетных боепрыпасаў Украіне — гэта часовая мера, як падкрэсліў Саліван. Яна прынятая на час нарошчвання аб'ёмаў вытворчасці звычайных артылерыйскіх боепрыпасаў.
Пра тое, што такое рашэнне, хутчэй за ўсё, будзе амерыканскім урадам прынята, учора паведамлялі на аснове інсайдарскай інфармацыі заходнія медыя.
Касетныя боепрыпасы звычайна выпускаюць вялікую колькасць дробных элементаў, якія могуць паражаць і забіваць цывільнае насельніцтва. Таксама ў гэтых боепрыпасаў параўнальна высокі працэнт выпадкаў, калі яны не выбухаюць, праз што яны ўяўляюць небяспеку на працягу многіх гадоў пасля завяршэння ваеннага канфлікту.
У 2008 годзе больш за 120 краін падпісалі дамову аб забароне вытворчасці, выкарыстання і назапашвання касетных боепрыпасаў. Злучаныя Штаты, Расія і Украіна, аднак, адмовіліся далучыцца да яе.
Цяпер чытаюць
У Гомелі за палітыку асудзілі кіраўніка аб'яднання, якое шукае парэшткі ахвяраў вайны і сталінскіх рэпрэсій, і яго жонку-медсястру8
Каментары