Магілёўскія суседзі Барыса Маісеева абверглі запушчаную ім байку пра нараджэнне ў калоніі
У нядзелю ў Магілёве на вуліцы Чалюскінцаў адкрылі мемарыяльную шыльду на доме, дзе некалі нарадзіўся і пражыў першыя 14 гадоў вядомы расійскі спявак Барыс Маісееў, што памёр летась. У сувязі з гэтым ягоныя былыя суседзі падзяліліся ў сацсетках успамінамі пра яго, развянчаўшы адзін з міфаў, які спявак пры жыцці актыўна прасоўваў, піша «Камсамольская праўда».
Спявак пражыў у доме па магілёўскай вуліцы Чалюскінцаў, 54 першыя чатырнаццаць гадоў свайго жыцця: з 1954-га да 1968-га.
Суседзі маці артыста Гені Барысаўны распавялі: гісторыя пра тое, што Барыс Маісееў нібыта нарадзіўся ў жаночай папраўчай калоніі (а яе артыст рэгулярна ў розных інтэрпрэтацыях распавядаў у інтэрв'ю) — не больш, чым выдумка і творчае перабольшанне, бо артыст быў па прыродзе вялікім містыфікатарам.
Былыя суседзі зоркі распавялі, што нарадзіўся ён у звычайнай радзільні, адкуль яго і прынеслі ў дом на Чалюскінцаў, 54. Там артыст і пражыў 14 гадоў, а праз некаторы час, скончыўшы школу, адправіўся ў Мінск, дзе і атрымаў адукацыю класічнага танцоўшчыка ў Мінскім харэаграфічным вучылішчы. А далей была праца галоўным балетмайстрам літоўскага аркестра «Трымітас», стварэнне трыа «Экспрэсія», дзе будучую зорку расійскай эстрады заўважыла Ала Пугачова…
Каментары