У Салігорску выстраілася вялікая чарга, каб дапамагчы чалавеку адужаць лейкемію
Жыхароў Салігорска заклікалі прыйсці раніцай у панядзелак, 24 ліпеня на станцыю пералівання крыві для забору крыві, каб дапамагчы жыхару горада Віктару Вуглову, які хворы на лейкемію. Адгукнуліся сотні людзей, паведамляюць на інстаграм-старонцы «Твой Салігорск».
Спачатку ад 8:00 да 10:00 павінны былі прыняць толькі 200 чалавек. Але прыём вырашылі падоўжыць да 13:00 і ўзяць больш узораў крыві. Паводле звестак «Беларуськалія», да 10:00 паспелі здаць кроў больш за 200 чалавек.
«Шанец, што нечая кроў падыдзе, невялікі. Але ўсіх донараў уносяць у базу і ў будучыні яны змогуць выратаваць нечае жыццё», — адзначае «Твой Салігорск».
Віктару Вуглову 29 гадоў, ён жанаты і выхоўвае трохгадовую дачку, працуе на «Беларуськаліі». Што яму патрэбна дапамога, стала вядома 20 ліпеня. Мужчына доўга лячыўся, і хіміятэрапія вывела хваробу ў рэмісію, але на непрацяглы час. Цяпер яму патрабуецца перасадка гемапаэтычных клетак — таксама яны называюцца гемацытабласты. Гэта самыя раннія папярэднікі клетак крыві, якія даюць пачатак усім астатнім крывяным клеткам і знаходзяцца ў асноўным у касцявым мозгу.
«Аднак верагоднасць знаходжання сумяшчальнага няроднаснага донара вельмі нізкая. І таму вельмі важна, каб нацыянальны рэестр такіх донараў быў максімальным. На сёння ён нешматлікі», — адзначае «Твой Салігорск».
Каб стаць магчымым донарам гемапаэтычных ствалавых клетак, трэба было запоўніць анкету і пагадненне аб унясенні сваіх даных у базу, а таксама здаць 10 мл перыферычнай крыві для аналізу. Калі хтосьці з салігарчан падыдзе, то здаць трэба будзе ўжо 500 мл крыві.
Патэнцыйным донарам гемапаэтычных ствалавых клетак можа стаць любы чалавек ад 18 да 50 гадоў.
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне63
Каментары