Ірак і некаторыя іншыя краіны з мусульманскай большасцю рэзка асудзілі спаленне Карана ў панядзелак ля будынка пасольства Ірака ў Капенгагене.
Двое сяброў групы «Дацкія патрыёты» растапталі і падпалілі святую кнігу ў латку з фольгі, паклаўшы яе на зямлю побач з іракскім сцягам. На мінулым тыдні сябры групоўкі транслявалі аналагічны акт у фэйсбуку, піша Бі-бі-сі.
Пасля гэтага каля тысячы дэманстрантаў у Багдадзе спрабавалі пранікнуць у пасольства Даніі.
На мінулым тыдні іракскі бежанец-хрысціянін атрымаў дазвол у другі раз спаліць Каран у Стакгольме. Праўда, ён не спаліў яго, але растаптаў нагамі. Шведская паліцыя спрабавала забараніць гэтае дзейства, аднак суд скасаваў забарону, спасылаючыся на законнае права на свабоду сходаў.
Швeцыі давялося эвакуяваць супрацоўнікаў свайго пасольства з Багдада пасля таго, як у будынак праніклі дэманстранты. Ірак таксама выслаў шведскага пасла, а ў мінулы чацвер пратэстоўцы ў Іраку падпалілі шведскую амбасаду ў Багдадзе.
Шведскія ўлады асудзілі спаленне свяшчэннай кнігі як ісламафобскае.
Міністэрства замежных спраў Ірака заявіла, што падобныя дзеянні дазваляюць «вірусу экстрэмізму і нянавісці» быць «рэальнай пагрозай мірнаму суіснаванню грамадстваў».
Чарговае апаганьванне кнігі ў сталіцы Даніі выклікала шматтысячную акцыю пратэсту ў еменскай сталіцы Сане, удзельнікі якой выказалі гнеў на адрас Даніі і Швецыі за тое, што яны дапускаюць падобныя дзеянні.
Турцыя назвала тое, што адбылося, «агідным нападам» на Каран, а Міністэрства замежных спраў Алжыра выклікала амбасадара Даніі і паверанага ў справах Швецыі, каб асудзіць гэтыя дзеянні.
Іран у суботу таксама выказаў пратэст у сувязі з падзеямі, якія адбыліся раней. СМІ Катара паведамілі, што на найбуйнейшым у краіне рынку Сук Аль-Баладзі на знак пратэсту былі канфіскаваныя шведскія тавары.
У суботу ў Багдадзе сілы бяспекі ўжылі слезацечны газ, каб не дапусціць вялікіх натоўпаў людзей да пасольства Даніі. Пераходы ва ўмацаваную «зялёную зону» горада, дзе размешчаны многія замежныя амбасады, былі закрытыя.
Цяпер чытаюць
«Кайлас, я іду». Што за беларуска знікла ў жудасным селі ў Непале9
Каментары