Асабістыя рэчы расіян трапілі пад санкцыі ЕС. Ці насамрэч на мяжы ў іх будуць канфіскоўваць машыны і адзенне? Тлумачыць Еўракамісія
У гісторыі з канфіскацыяй асабістых рэчаў расіян у Еўропе новы паварот. У мінулую пятніцу Еўракамісія выпусціла тлумачэнне аб тым, што машыны з расійскімі нумарамі трапляюць пад санкцыі супраць Расіі за ўварванне ва Украіну, бо ўключаныя ў спіс тавараў, імпарт якіх забаронены.
Усе неадкладна прачыталі гэты доўгі спіс (Annex XXI) і знайшлі ў ім мабільныя тэлефоны, касметыку, фотаапараты, чамаданы, адзенне, нават яхты, мэблю і зборныя дамы пад ключ. Узнікла пытанне: усё гэта будуць зараз канфіскоўваць у расіян, якія выязджаюць у Еўрасаюз ці жывуць там?
Не зусім так, патлумачылі прадстаўнікі Еўракамісіі на штодзённым брыфінгу ў панядзелак. Сутнасць іх каментароў зводзілася да наступнага.
Санкцыі былі ўзгодненыя і зацверджаныя кіраўнікамі краін ЕС, дэмакратычна абранымі ў кожнай з 27 краін Еўрасаюза з насельніцтвам 450 млн чалавек. Еўракамісія ж — проста бюракраты ў Бруселі. Яна каардынуе ажыццяўленне рашэнняў і толькі зрэдку дае рэкамендацыі з адной мэтай — каб не было рознагалосся ў інтэрпрэтацыях санкцыйнага рэжыму.
Аднак правапрымяненне — справа кожнай асобнай краіны. Мытня Фінляндыі, Латвіі ці Эстоніі не падпарадкоўваецца Еўракамісіі, але калі ва ўладаў гэтых краін ёсць пытанні, яны могуць іх задаць Бруселю.
Што і здарылася гэтым разам: камісія выпусціла тлумачэнне пасля таго, як немцы пачалі арыштоўваць машыны з расійскімі нумарамі, а іншыя краіны задумаліся, ці праўда гэта мелася на ўвазе, калі ўводзіліся санкцыі супраць Крамля.
«Гэта адзін з тых выпадкаў, калі мы проста растлумачылі сітуацыю. Уласна кажучы, санкцыі не змяніліся — як была забарона на імпарт, так і засталася. Пералік не змяніўся, у ім прысутнічаюць аўтамабілі», — сказаў прадстаўнік Еўракамісіі на брыфінгу.
Ён дадаў, што санкцыі павінны прымяняцца строга, але ўдакладніў, што гэта толькі «рэкамендацыя» Еўракамісіі.
У тлумачэннях з таго, што патэнцыйна можа закрануць людзей, а не бізнэс, былі згаданыя толькі ікра (увозіць нельга), машыны і ювелірныя ўпрыгожанні. Пра залатыя пярсцёнкі і завушніцы было сказана, што санкцыі не распаўсюджваюцца на ўсё, што ўвозіцца для асабістага карыстання, а не для продажу.
Так як у санкцыйным спісе значна больш тавараў, чым было згадана ў тлумачэнні, журналісты засыпалі прадстаўніка Еўракамісіі пытаннямі, ці будуць расіян «раскулачваць» на мяжы.
Ён адказаў, што рашэнне за ўладамі краін — членаў ЕС, але выказаў меркаванне, што здаровы сэнс возьме верх.
«Мэта санкцый не змянілася — пазбавіць Крэмль сродкаў на вайну. Адзенне на чалавеку наўрад ці будзе лічыцца спробай абысці санкцыі. Гэта проста разумны сэнс, — сказаў ён. — А вось дарагі аўтамабіль — ужо іншая справа».
Васкрасенскі: Трэба, каб Сікорскі прывёз падарунак Лукашэнку. А Бяляцкі і 20 завадатараў выйдуць апошнімі26
Каментары