Украінскую гарэлку Nemiroff плануецца выпускаць на лікёра‑гарэлачным заводзе «Мінск Крышталь».
Пра гэта сказаў старшыня канцэрна «Белдзяржхарчпрам» Іван Данчанка на прэс‑канферэнцыі 28 снежня ў Мінску.
Як паведамлялася раней, украінская кампанія правяла аўдыт беларускіх лікёра‑гарэлачных прадпрыемстваў на прадмет магчымасці ліцэнзійнай вытворчасці гарэлкі названай гандлёвай маркі. Паводле слоў Данчанкі, хутчэй за ўсё, вытворчасць будзе арганізаваная ў Мінску.
«Цяпер трэба падлічыць эканоміку і вырашыць, ці будзе гэта выгадна бакам», — адзначыў Данчанка. Ён падкрэсліў, што ў выпадку станоўчага рашэння
пры вытворчасці будзе выкарыстоўвацца беларускі спірт, беларускі цукар, беларуская бутэлька і беларускі корак.
«Ад партнёра мы будзем мець пашыраную сетку рэалізацыі, імя і рэцэптуру», — адзначыў старшыня канцэрна.
Ён нагадаў, што ў Беларусі ўжо наладжаны выпуск ірландскага віскі, грузінскіх, малдаўскіх і армянскіх каньякоў, плануецца вытворчасць французскіх каньякоў.
Разам з тым Данчанка адзначыў, што «алкагольны рынак Беларусі перапоўнены». У краіне выпускаецца 145 млн. літраў гарэлкі. Рынкі суседніх краін (Украіны і Расіі) таксама перапоўненыя алкаголем, адзначыў кіраўнік канцэрна. Паводле яго інфармацыі, у 2009 годзе тэмп росту экспарту беларускай лікёра‑гарэлачнай прадукцыі складзе 140% да ўзроўню 2008 года, ці каля 500 тыс. дал. Сёлета пачаты пастаўкі ў Санкт‑Пецярбург і Чэлябінск.
«Шмат алкаголю было пастаўлена ў краіны Балтыі. Да 10% алкаголю ў Прыбалтыцы — гэта беларускі алкаголь», — адзначыў Данчанка.
Каментары