Школа, якую заснавала памерлая жонка экс-хакеіста зборнай Беларусі, ахвяравала буйную суму анкахворым — і закрылася
На днях у сацсетках аднаго з праектаў беларускага фонду «КіндэрВіта» з'явіўся допіс пра тое, што ў падтрымку арганізацыі паступіў буйны дабрачынны перавод — 31 тысяча рублёў.
Гэтую суму ахвяравала анлайн-школа маркетынгу Mira School, адной з заснавальніц якой была жонка экс-хакеіста зборнай Беларусі Дзмітрыя Мялешкі, піша «Трыбуна».
Надзея Мялешка стала вядомая дзясяткам тысяч людзей не толькі праз свой праект, у якім, як было заяўлена на старонцы, навучаюць дыстанцыйным прафесіям з нуля. У пачатку 2020-га жанчына распавяла, што ў яе дыягнаставалі рак грудзей. У сваіх сацсетках яна дэтальна расказвала пра сваё лячэнне і тыя цяжкасці, якія пераадольвала.
23 сакавіка 2023 года стала вядома, што Надзея памерла — допіс з трагічнай весткай ад яе імя апублікавалі ейныя калегі.
Mira School як праект працягнуў існаваць пасля смерці Надзеі, аднак пратрымаўся ўсяго некалькі месяцаў. 20 кастрычніка ў сацсетках зʼявілася інфармацыя аб тым, што школа ліквідуецца, а акаўнт «апускаецца ў цішыню».
У снежні гэтую інфармацыю пацвердзіла і сузаснавальніца школы Міла Літвінская:
«Пасля сыходу Надзеі мы далі ўсім ахвотным апошнюю магчымасць атрымаць анлайн-прафесію і выпусцілі яшчэ пару курсаў. Але ўсё ж без Надзі Мялешка школу цяжка ўявіць. Яна была яе душой, таму прынялі такое няпростае рашэнне».
Дабрачынны перавод — гэта ўчынак, якім каманда школы хацела завяршыць праект і які, на меркаванне калег, узрадаваў бы Надзею Мялешка, бо і яна падтрымлівала людзей з анказахворваннямі (нават заснавала спецыяльны фонд «Надзея», але не паспела яго зарэгістраваць афіцыйна).
Паводле Літвінскай, падтрымаць праект «КіндэрВіты» прапанавалі родныя Надзеі і вучні анлайн-школы. Гэтая рэкамендацыя была не выпадковай. Кіраўніца дабрачыннай арганізацыі Надзея Манцэвіч была асабіста знаёмая з Надзеяй Мялешка і дапамагала ёй з арганізацыяй працы фонду «Надзея».
«Я шчыра спадзяюся, што пералічаныя грошы дапамогуць адным перамагчы хваробу, а іншым — не адчуць таго болю страты, што перажылі родныя, каманда і сябры Надзі Мялешка, — кажа Літвінская.
Гэтая навіна засмуціла шматлікіх выпускнікоў школы.
Пасля паведамлення аб ліквідацыі Літвінская правяла жывы эфір на інстаграм-старонцы школы, у якім абмеркавала, «чаму мары не спраўджваюцца».
Кніга беларускай блогеркі, якая змагалася з ракам, б'е рэкорды продажаў
«Шкадую, што яна не паспела ўзяць яе ў рукі». Прадалі 15000 экзэмпляраў кнігі Надзеі Мялешка, якая змагалася з анкалогіяй
Памерла Надзея Мялешка — папулярная блогерка і жонка хакеіста зборнай. Яна пакінула на выпадак смерці кранальны пост
Каментары