Дзе знаходзіцца геаграфічны цэнтр Еўропы, і як гэты самы цэнтр лічыць? Некалькі краін прэтэндуюць на тое, каб называецца цэнтрам Еўропы. У беларусаў, украінцаў, палякаў, літоўцаў, магчыма, у кагосьці яшчэ існуюць нават геаграфічныя знакі, і ў кожнага свая, самая правільная метадалогія (як гэтая метадалогія спалучаецца з успрыманнем Расіі як не часткі Еўропы, пытаць не будзем). Але для мяне бясспрэчным цэнтрам Еўропы з'яўляецца аўстрыйскі Інсбрук, піша ў фэйсбуку Максім Маханькоў.
Глядзіце самі. Горад знаходзіцца ў той вузкай заходняй частцы Аўстрыі, якая «заціснутая» паміж вялікімі па плошчы і насельніцтве Нямеччынай і Італіяй (з цэнтра Інсбрука да Італіі і Нямеччыны можна даехаць хвілін за 20). За некалькі гадзін на машыне можна дабрацца да Ліхтэнштэйна, Швейцарыі і Францыі, а таксама Славеніі і Чэхіі. Ну чым вам не цэнтр Еўропы?
Чаму цэнтр Еўропы не ў Беларусі і не ва Украіне? Не, не таму што Расія не Еўропа (без усялякіх сумненняў, Расія гэта еўрапейская краіна, хаця і перыферыйная ды адсталая).
Рэч у тым, што калі гаворка ідзе пра Еўропу, пра культурна-гістарычна-цывілізацыйны рэгіён, прастору нельга вымяраць выключна кіламетражом.
Прастора павінна мець некалькі вымярэнняў, і ўлічваць шчыльнасць насельніцтва, моўна-культурную і прыродную разнастайнасць, узровень эканамічнага развіцця, культурны ўплыў, якасць транспартнай інфраструктуры і многае-многае іншае.
Хоць Расія і з'яўляецца еўрапейскай краінай (як геаграфічна, бо абсалютная большасць насельніцтва і эканамічнай актыўнасці знаходзяцца ў Еўропе, так і ў гістарычна-палітычным плане), але Расію ну ніяк нельга лічыць за палову Еўропы.
На гэтых вялікіх прасторах вельмі нізкая шчыльнасць насельніцтва (на велізарнай Еўрапейскай частцы Расіі людзей жыве прыкладна столькі ж, як у Нямеччыне).
Гэтая вялікая тэрыторыя адносна гамагенная ў моўна-культурным і інфармацыйным плане, а вакол умоўнага Інсбрука не тое што дыялекты, а нават мовы змяняюцца адна за адной у працэсе перасоўвання кожныя 20 хвілін.
У культурным, навуковым і эканамічным плане Расія таксама далёка не палова Еўропы, тым больш, што яна супрацьпастаўляе сябе Еўропе на ўсіх узроўнях.
Калі ж браць усе гэтыя пералічаныя мной культурна-геаграфічна-палітычна-эканамічныя вымярэнні прасторы, то цэнтр Еўропы гэта, безумоўна, Інсбрук.
Чытайце таксама:
-
ГУБАЗіК перастаў выкладаць відэа з затрыманымі. З дня, калі да гэтага заклікаў канал, блізкі да Маркава
-
Калі Украіна захавае суверэнітэт узамен за нейтральнасць, што гэта будзе значыць для Беларусі?
-
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?
«Таня, мы з табой!» Улады запусцілі флэшмоб у падтрымку жанчыны ў чырвона-зялёным ВІДЭА19
Каментары