Ціханоўская ў Варшаве сустрэлася з прэзідэнтам Польшчы і кіраўніцтвам польскага парламента
Святлана Ціханоўская падчас сваёй працоўнай паездкі ў Варшаву 9 студзеня правяла сустрэчы з польскім кіраўніцтвам. Пры гэтым, што важна, яна сустрэлася і з прэзідэнтам Польшчы Анджэем Дудам, і з кіраўніцтвам польскага парламента, якія цяпер паміж сабой у канфлікце.
Цяпер у Польшчы існуе дастаткова вострае ўнутранае суперніцтва паміж прэзідэнтам ад партыі «Закон і справядлівасць» Анджэем Дудай і прадстаўнікамі кааліцыі, якая перамагла восенню мінулага года на парламенцкіх выбарах і цяпер кантралюе ўрад і парламент. Аднак супярэчнасці, як выглядае, не тычацца стаўлення да беларускага пытання і Святланы Ціханоўскай як паўнамоцнай прадстаўніцы беларускай грамадзянскай супольнасці за мяжой.
Анджэй Дуда пасля сустрэчы з Ціханоўскай выклаў у сацсетцы Х сумеснае фота з ёй, напісаўшы:
«Усюды, дзе я знаходжуся на міжнародным форуме, калі я кажу пра сітуацыю ў Беларусі, я заўсёды згадваю вас — беларускую супольнасць.
Прыйдзе час, калі мы ўсе разам будзем атрымліваць асалоду ад свабоды і суверэнітэту; мы без страху пяройдзем польска-беларускую мяжу.
Я заўсёды буду падтрымліваць дзеянні тых, хто хоча свабоднай Беларусі».
У той жа час спікеры польскіх Сейма і Сената Шыман Галоўня і Малгажата Кідава-Блоньска падчас сустрэчы са Святланай Ціханоўскай і дэлегацыяй Аб'яднанага пераходнага кабінета Беларусі запэўнілі беларускі бок у поўнай падтрымцы дэмакратычных сілаў Беларусі. Таксама суразмоўцы пагадзіліся: патрэбна новая, больш эфектыўная, стратэгія па Беларусі для вызвалення палітвязняў і спынення рэпрэсій.
Польскія палітыкі пагадзіліся правесці слуханні па Беларусі ў Сейме і Сенаце — і вынесці рэзалюцыю. Плануецца, што дакумент ухваліць падтрымку еўрапейскага выбару Беларусі, неабходнасць неадкладнага вызвалення палітзняволеных і падтрымае прыцягненне рэжыму Лукашэнкі да адказнасці.
Асобна бакі абмеркавалі стварэнне беларускіх школ у Польшчы і пашырэнне магчымасцяў для беларускамоўнай адукацыі дзяцей.
Цяпер чытаюць
Сталі вядомыя падрабязнасці пра трагедыю ў Полацкім манастыры16
Сталі вядомыя падрабязнасці пра трагедыю ў Полацкім манастыры
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары