Прэзідэнтам Фінляндыі стаў Аляксандр Стуб. Яго бацька — швед, а жонка — брытанка
Былы фінскі прэм'ер-кансерватар вярнуўся ў палітыку пасля сямігадовага перапынку.
Аляксандр Стуб атрымаў перамогу ў другім туры прэзідэнцкіх выбараў і абагнаўшы свайго суперніка, былога кіраўніка МЗС Пека Хаавісту, піша Бі-бі-сі.
Пасля падліку 100% бюлетэняў Стуб атрымаў 51,7%, Хаавіста набірае 48,3% галасоў. Прагнозы карпарацыі Yle прадказвалі, што Стуб набярэ 51,4% галасоў.
«Што ж, Аляксандр. Віншую 13-га прэзідэнта Фінляндыі», — сказаў Хаавіста ў прамым тэлеэфіры.
Змена геапалітычнага ландшафту ў Еўропе праз вайну ва Украіне стане галоўным выклікам для новага кіраўніка дзяржавы, які, маючы абмежаваныя паўнамоцтвы ў параўнанні з прэм'ер-міністрам, разам з урадам вызначае замежную палітыку краіны і выступае ў якасці вярхоўнага галоўнакамандуючага ўзброенымі сіламі Фінляндыі.
Рашэнне пайсці на выбары было прадыктавана сітуацыяй, у якой краіна аказалася пасля ўварвання Расіі ва Украіну, казаў Стуб.
«Магу сказаць, паклаўшы руку на сэрца, што да пачатку вайны гэтыя меркаванні [аб вылучэнні на пасаду] не былі рэальнасцю, — заявіў ён у жніўні. — Калі Радзіма кліча, вы ідзяце».
Пасля перамогі на выбарах Стуб сказаў, што стаць прэзідэнтам — «найвялікшы гонар у яго жыцці».
«Фінляндыя стаіць на парозе новай эры, паколькі міжнародныя правілы аспрэчваюцца з розных бакоў. Акрамя таго, Фінляндыя — новы чалец NATO. Я цвёрда ўпэўнены, што ў найбліжэйшыя некалькі гадоў Фінляндыя застанецца найлепшай краінай у свеце», — заявіў Аляксандр Стуб.
Як паведамляе Yle са спасылкай на Цэнтрвыбаркам, яўка ў другім туры склала 70,7% (датэрмінова прагаласавалі 46 працэнтаў). У першым туры ў выбарах узялі ўдзел 75% выбаршчыкаў.
55-гадовы Кай-Ёран Аляксандр Стуб быў прэм'ер-міністрам Фінляндыі ў 2014-2015 гг., калі ўзначальваў нацыянальную кааліцыю — Ліберальна-кансерватыўную партыю, якая і цяпер з'яўляецца галоўнай партыяй ва ўрадавай кааліцыі. Выбары лідара партыі Стуб у 2016 годзе прайграў менавіта цяперашняму прэм'еру, Петэры Орпа.
Стуб выступаў за ўваходжанне Фінляндыі ў NATO задоўга да нападу Расіі на Украіну. Акрамя таго, новы прэзідэнт — перакананы прыхільнік Еўрасаюза і паглыблення еўраінтэграцыі.
Стуб — праціўнік жорсткага абмежавання іміграцыі: ён лічыць, што прыток імігрантаў дабратворна ўплывае на грамадства і эканоміку
Пасля сыходу з пасады прэм'ера Стуб быў міністрам фінансаў, а да прэм'ерства займаў пасады міністра замежных спраў і міністра па еўрапейскіх справах, а таксама быў дэпутатам Еўрапарламента і парламента Фінляндыі.
Бацька Стуба — фінскі швед Ёран Стуб, які быў хакеістам і ўзначальваў Федэрацыю хакея Фінляндыі. Маці — фінка.
Жонка — С'юзан Інес-Стуб, якая працавала ў бельгійскай юрыдычнай фірме. Яна сама з графства Эсэкс (Англія), яе бацька — шатландзец. С'юзан Інэс-Стуб стане першай жанчынай замежнага паходжання, якая стала першай лэдзі Фінляндыі.
Аляксандр Стуб свабодна размаўляе на абедзвюх дзяржаўных мовах Фінляндыі, а таксама на англійскай, французскай і нямецкай.
Цяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам14
Каментары