Як змянілася прапускная здольнасць на мяжы з Літвой пасля закрыцця двух пунктаў пропуску
Анансавалася, што афармляць кіроўцаў будуць хутчэй.
На мяжы з Літвой ад 1 сакавіка функцыянуюць толькі два пункты пропуску: «Шальчанінкай — Беняконі» і «Мядзінінкай — Каменны Лог».
Калі літоўскі бок анансаваў прапанову аб закрыцці двух пунктаў пропуску на мяжы з Беларуссю, міністр замежных спраў Агне Білатайтэ казала, што гэта дазволіць больш эфектыўна выкарыстоўваць КПП «Мядзінінкай» («Каменны Лог»).
Беларускі бок у сваю чаргу заявіў, што перанакіруе супрацоўнікаў і тэхнічныя сродкі мытнага кантролю з закрытых пунктаў пропуску на тыя, што застануцца, каб зменшыць час афармлення.
Але, як паказвае статыстыка Пагранкамітэта Беларусі, у двух пунктах пропуску, што засталіся працаваць, колькасць аформленых за суткі транспартных сродкаў не павялічылася.
Так, напрыклад, за апошнія суткі праз «Каменны Лог» праехала 87 грузавікоў, а праз «Беняконі» — 151. Падобныя лічбы ДПК называў і 1 сакавіка — 75 і 123 грузавікі адпаведна. Па стане на 29 лютага лічбы былі такія — 90 грузавікоў у «Каменным Лозе» і 152 у «Беняконях».
Нягледзячы на сціплыя паказчыкі, «Каменны Лог» («Мядзінінкай» з літоўскага боку) мае самую высокую прапускную здольнасць сярод усіх пунктаў пропуску (у тым ліку закрытых) на беларуска-літоўскай мяжы. За суткі праз яго могуць праехаць 500 грузавікоў і 600 легкавікоў. Але, як бачна, рэальныя лічбы куды больш сціплыя. Нават калі параўноўваць яго з меншымі «Беняконямі».
Як змяніліся чэргі з 1 сакавіка?
Па стане на 14 гадзін 4 сакавіка, выезду з Беларусі ў «Каменным Лозе» чакаюць больш за 810 грузавікоў. У «Беняконях» — больш за 660.
Тыдзень таму (26.02.2024), калі на мяжы з Літвой працавалі чатыры пункты пропуску, сітуацыя з чэргамі грузавікоў выглядала так: «Каменны Лог» — каля 300 вялікагрузаў, «Беняконі» — каля 230.
Яшчэ тыднем раней (19.02.2024), выезду з Беларусі чакалі каля 230 грузавікоў у «Каменым Лозе» і каля 200 у «Беняконях».
Што на іншых кірунках?
Вялікія чэргі з грузавікоў таксама назіраюцца на мяжы з Латвіяй. Выезду з Беларусі чакаюць больш за 400 вялікагрузаў. На мяжы з Польшчай — 120.
Сярод легкавога транспарту найбольшая чарга ў пункце пропуску «Брэст» — больш за 240 легкавікоў. На літоўскім кірунку — больш за 20 у «Каменным лозе» і больш за 70 у «Беняконях».
На мяжы з Латвіяй чаргі з легкавікоў па стане на 14 гадзін 4 сакавіка няма.
Калі глядзець на агульныя лічбы, то найбольшую колькасць машын афармляюць на польскім кірунку. Праз «Казловічы» за апошнія суткі праехала 827 вялікагрузаў, а праз «Брэст» — 720 легкавых аўто. Праз два пункты пропуску на мяжы з Літвой і адзін на мяжы з Латвіяй за апошнія суткі агулам праехала 352 грузавыя аўто і 753 легкавікі.
Чытайце таксама:
Як цяпер дабрацца з Гродна ў Друскенікі на маршрутцы
«Многія спадзяюцца на хуткае адкрыццё «Брузгоў». Што кажуць гродзенцы пра жыццё ў «аблозе»
«Я падняў аднаго са слабавікоў — і выпусціў яго на асфальт». Дэсантнік Руслан Акостка расказаў, як адседзеў 4 гады21
Каментары