Алег Трусаў: Вынік года — рэгіянальныя навіны па‑беларуску.
Мінуў год пасля сустрэчы старшыні Таварыства беларускай мовы Алега Трусава і кіраўніка Нацыянальнай дзяржтэлерадыёкампаніі Аляксандра Зімоўскага. Яна адбылася 27 студзеня 2009 года з ініцыятывы старшыні ТБМ. Тады А.Трусаў агучыў сем прапаноў кіраўніцтву НДТРК па выпраўленні моўнай палітыкі дзяржаўнага тэлебачання.
Нагадаем, А.Зімоўскі пагадзіўся з пяццю пунктамі: заснаваць на адным з дзяржаўных тэлеканалаў перадачу «Гаворым па‑беларуску»; стварыць цыкл беларускамоўных перадач на гістарычную тэматыку; зрабіць перадачу, прысвечаную 10‑й гадавіне Міжнароднага дня роднай мовы; раз на месяц ладзіць на тэлебачанні тэматычныя круглыя сталы па пытаннях беларускай мовы і культуры з удзелам незалежных грамадскіх арганізацый; аднавіць дубляж замежных фільмаў на беларускую мову.
Дзве прапановы ТБМ (зрабіць Першы нацыянальны канал цалкам беларускамоўным і рабіць зніжку за рэкламу па‑беларуску) не знайшлі водгуку. А.Зімоўскі адзначыў, што пытанні патрабуюць «асобнага дэтальнага разгляду».
Што ж з абяцанага было зроблена за год? А.Трусаў так каментуе вынікі:
«Створана на АНТ перадача «Гаворым па‑беларуску», і мы вельмі гэтым задаволеныя.Зараз ідуць перамовы па з’яўленні аналагічнай на Першым канале. Што датычыць цыкла беларускамоўных перадач на гістарычную і культурніцкую тэматыку, у нейкай ступені гэта рэалізавана на АНТ. Там існуе перадача пра гісторыю беларускіх слоў. Былі перадачы, прысвечаныя Дню роднай мовы».
На думку А.Трусава, павісла ў паветры абяцанне раз на месяц ладзіць на тэлебачанні абмеркаванне праблем нацыянальнай мовы і культуры. «Было ток‑шоу «Выбар», прысвечанае стаўленню да мовы і культуры. Але пасля таго, як дзесяць тысяч гледачоў выказалася ў падтрымку нацыянальных каштоўнасцяў, на тэлебачанні спалохаліся».
Колькасць мастацкіх фільмаў, дубляваных на беларускую мову, не павялічылася, кажа А.Трусаў. Дадамо: быў нуль і застаўся нуль.
Затое пры канцы 2009‑га Белтэлерадыёкампанія перавяла на беларускую мову рэгіянальныя навіны, адзначае А.Трусаў. Гэта, напэўна, і было самым важным крокам да беларусізацыі БТ. Караценькая перадача «Гаворым па‑беларуску» з экзатычным вядучым шмат для каго застанецца незаўважнай цікавосткай, а штодзённыя беларускамоўныя навіны з іх высокім глядацкім рэйтынгам будуць мець большы эфект.
Цяпер чытаюць
Вайб-праграмаванне зменіць ролю распрацоўшчыка, RLVR і калі лопне бурбалка. Беларус-інжынер у галіне ШІ, які працуе ў ЗША, расказаў, што нас чакае ў 2026
Каментары