Па стане на 1 ліпеня ў Літве пражывала 221 285 замежнікаў. Украінская дыяспара застаецца самай вялікай у Літве — 76 145 чалавек, піша Delfi.lt
Больш за палову гэтых замежнікаў — амаль 44 тысячы — з'яўляюцца вайсковымі ўцекачамі, якія пакінулі краіну з-за расійскай агрэсіі, яны падпадаюць пад дзеянне механізму часовай абароны, уведзенага ЕС. Колькасць украінцаў, якія пражываюць у Літве, за апошнія шэсць месяцаў скарацілася на 10 тысяч.
Другой па велічыні прыезджай дыяспарай у Літве з'яўляюцца беларусы, за апошнія паўгода колькасць крыху павялічылася. Паводле звестак на 1 ліпеня, усяго ў Літве пражывала 62 535 грамадзян Беларусі, а на 1 студзеня такіх асоб было 62 167.
Колькасць грамадзян Расіі, якія пражываюць у Літве, некалькі зменшылася. На пачатак гэтага года ў Літве пражывала 15 тысяч 888 расіянаў, на 1 ліпеня — 15 536.
Чацвёртая па велічыні замежная дыяспара ў Літве — узбекі. За апошнія шэсць месяцаў колькасць грамадзян гэтай цэнтральнаазіяцкай краіны павялічылася з 8,2 тыс. чалавек на 1 студзеня да 10,2 тыс. на 1 ліпеня.
Пятае месца — таджыкі, якіх цяпер у Літве пражывае амаль 7 тыс. Паўгода таму колькасць грамадзян Таджыкістана была крыху меншай — 5,7 тыс.
Большая частка ўсіх грамадзян замежных краін, якія пражываюць у краіне, працягваюць прыязджаць на заробкі. Наступнымі па велічыні групамі з'яўляюцца члены сем'яў, высокакваліфікаваныя рабочыя і студэнты, паказваецца ў паведамленні.
Адзначаецца, што колькасць пашпартоў, якія выдаюцца замежнікам, паступова павялічваецца. У 2023 годзе такія дакументы атрымалі 84 замежнікі, а ў першым паўгоддзі гэтага года выдадзена ўжо 85.
У Літве такія дакументы выдаюцца замежнікам з правам пражывання ў краіне, якія па аб'ектыўных прычынах не могуць атрымаць адпаведны дакумент у краіне паходжання.
Па звестках Дэпартамента міграцыі, рост колькасці выдаваных пашпартоў замежнікаў звязаны з рашэннем рэжыму Аляксандра Лукашэнкі не дазваляць мяняць дакументы ў дыппрадстаўніцтвах у замежных краінах.
Падрабязнасці тэракту Крыгера пад Азярышчам — разбураныя шпалы і ніводнага параненага8
Каментары