Жанчыну-мэра на Філіпінах абвінавачваюць у шпіянажы на Кітай. Высветлілася, што яна не тая, за каго сябе выдавала

Эліс Ліл Гуо (Alice Leal Guo) у 2022 годзе перамагла на выбарах мэра горада Бамбан (насельніцтва каля 80 тысяч) на поўнач ад сталіцы Філіпін Манілы ў правінцыі Тарлак.

У сакавіку 2024 года ёй выставілі адразу некалькі абвінавачанняў. Сярод іх выкарыстанне падробленага пасведчання асобы, шпіянаж на карысць Кітая і прыналежнасць да сіндыката філіпінскага афшорнага ігральнага аператара (POGO).

Усё пачалося з таго, што следчыя выявілі, што Гуо з'яўляецца ўладальніцай зямельнага ўчастка, на якой размешчана анлайн-казіно сеткі POGO (Philippine Offshore Gambling Operator — Філіпінскі афшорны аператар азартных гульняў).

Насамрэч, за шыльдай казіно хаваўся цэнтр анлайн-махлярства. У сакавіку мінулага года ўлады правялі рэйд на аб'ект і вызвалілі каля 700 работнікаў, у тым ліку 202 грамадзян Кітая і 73 іншых замежнікаў, якіх прымушалі выдаваць сябе за інтэрнэт-палюбоўнікаў.

Злачынныя групоўкі, якія працавалі пад шыльдай POGO, таксама стварылі бальніцы, якія прапаноўвалі пластычныя аперацыі ўцекачам, якія хочуць змяніць твар.

На Гуо быў зарэгістраваны верталёт і аўтамабіль Ford Expedition, які знайшлі на тэрыторыі адной з кампаній, што ўваходзяць у POGO. Сама Гуо сцвярджае, што ўсю гэтую маёмасць яна прадала да свайго абрання ў 2022 годзе.

Што вядома аб мінулым Эліс Гуо

У маі 2024 года справа Гуо апынулася ў цэнтры ўвагі сенацкай камісіі. Кіраўніца камісіі звярнула ўвагу, што імя Го ўсплыло толькі падчас выбараў 2022 года. Гэта вельмі незвычайна для філіпінскай правінцыі, дзе мясцовыя чыноўнікі часта звязаны з палітычнымі дынастыямі.

Сам прэзідэнт Філіпін Фердынанд Маркас адзначыў, што ведае большасць палітыкаў у правінцыі Тарлак, але ніхто з іх не ведае мэра Бамбана.

Акрамя гэтага, аб Гуо няма ніякіх запісаў аб нараджэнні ў бальніцы або школьных запісаў на Філіпінах.

Падчас расследавання ў сенаце Го прызналася, што яе пасведчанне аб нараджэнні было зарэгістраванае ў мясцовых органах улады толькі тады, калі ёй было 17 гадоў.

Паводле слоў жанчыны, гэта звязана з тым, што яна нарадзілася дома, а не ў бальніцы. Жанчына сцвярджае, што маці кінула яе, калі яна была яшчэ немаўлём, і яна вырасла з бацькам на свінаферме.

Па словах Гуо, яна навучалася дома, але пры гэтым не змагла ўзгадаць назву арганізацыі, якая займалася яе хатнім навучаннем, і назвала толькі аднаго са сваіх настаўнікаў.

Гуо сказала, што ёй было сорамна, што яна незаконнанароджаная, і менавіта таму яна большую частку часу праводзіла на сямейнай свінаферме і дапамагала бацьку ў бізнэсе.

Не тая, за каго сябе выдае

Пазней высветлілася, што імёны бацькі і маці, якія пазначаны ў пасведчанні аб нараджэнні Гуо, выдуманыя. Насамрэч такіх людзей не існавала.

Былі выяўленыя дакументы, у адпаведнасці з якімі Эліс Гуо насамрэч можа быць Гуо Хуа Пін, якая ўехала на Філіпіны 12 студзеня 2003 года, калі ёй па дакументах было 13 гадоў, разам з бацькамі па спецыяльнай інвестарскай візе. Яе дата нараджэння па тых дакументах — 31 жніўня 1990 года.

Падчас далейшага расследавання быў знойдзены дакумент з Нацыянальнага бюро расследаванняў, які змяшчае фатаграфію іншай жанчыны па імені Эліс Лі Гуо. Жанчына мае такую ж дату нараджэння, што запісана ў пасведчанні аб нараджэнні абвінавачанай — 12 ліпеня 1986 года.

Пазней следчыя высветлілі, што ў абвінавачанай такія ж адбіткі пальцаў, як і ва ўладальніка кітайскага пашпарта Гуо Хуа Пін.

10 ліпені камітэт сената распарадзіўся выдаць ордар на арышт Эліс Гуо. Але жанчына схавалася ад праваахоўнікаў.

Справа набыла шырокі розгалас, жанчыну сталі абвінавачваць у шпіянажы на Кітай. Гэтаму спрыяе і напружанасць у адносінах паміж Манілай і Пекінам з-за спрэчных тэрыторый у Паўднёва-Кітайскім моры.

• 0
• 0
• 0
• 0
• 3
• 0
• 0
• 0