Беларускія ўлады могуць не пакінуць польскаму боку іншай магчымасці і ён пойдзе на закрыццё мяжы. Пра гэта ў эфіры RMF24 заявіў міністр замежных спраў Польшчы Радаслаў Сікорскі. Па ягоных словах, Мінск ведае, што трэба зрабіць для паляпшэння адносін з Варшавай, а Кітай выказаў занепакоенасць з сітуацыяй на мяжы, піша reformby.org.
«Адносіны з Беларуссю дрэнныя па віне Беларусі. Гэта ў Беларусі бяспрыкладная колькасць палітычных зняволеных, у тым ліку Анджэй Пачобут. Гэта Беларусь, нагадаю, пасадзіла еўрапейскі самалёт у Мінску, каб арыштаваць дысідэнта, за што атрымала еўрапейскія санкцыі, і ў выніку выйшла з пагаднення аб рэадмісіі.
Цяпер колькасць нелегальных спробаў парушэння польскай, саюзнай мяжы крыху знізілася, але бачым, што рэжым расейскі, беларускі выкарыстоўвае, уключае і выключае наплыў нелегальных мігрантаў у адпаведнасці з нейкімі палітычнымі інструкцыямі. Так сябе не паводзіць добры сусед. Беларусь павінна нешта зрабіць, каб адносіны палепшыць», — сказаў ён.
Міністр адзначыў, што паводле яго інфармацыі кітайскі бок выказаў беларускаму боку занепакоенасць сітуацый на мяжы з Польшчай і ў частцы руху тавараў і ў частцы руху фізічных асоб. Раней прэзідэнт Польшчы Анджэй Дуда ў часе візіту ў КНР узнімаў пытанне мяжы з Беларуссю на перамовах з Сі Цзіньпінам. На мінулым тыдні міністр замежных спраў Беларусі Максім Рыжанкоў у эфіры тэлебачання заявіў, што «польскі шантаж» праваліўся.
Адказваючы на пытанне аб меркаваным закрыцці мяжы, Сікорскі падкрэсліў, што гэта суверэннае права Польшчы, а беларускія ўлады могуць не пакінуць ёй іншага выйсця.
«Гэта нашае суверэннае права. Большасць памежных пераходаў ужо зачыненыя, што відавочна звязана з нязручнасцямі роўна як для простых беларусаў, так і нашых грамадзян. Але рэжым можа нам не пакінуць іншай магчымасці», — сказаў ён.
«Наколькі ведаю, на гэтай мяжы ўжо даходзіла да затрымак, звязаных з больш дбайным кантролем і нашай неабходнасцю выконваць санкцыі ў дачыненні да тавараў, якія могуць мець падвойнае прызначэнне. Еўрапейскія кампаненты не павінны знаходзіцца ў расійскіх дронах, ракетах», — дадаў міністр.
У адказ на прамое пытанне, ці дапаможа закрыццё мяжы вызваліць Анджэя Пачобута і забяспечыць выдачу мігранта, які з смяротна параніў польскага салдата, Сікорскі заявіў, што «Беларусь ведае, што трэба зрабіць, каб адносіны палепшыліся». Ён таксама падкрэсліў, што знаходжанне ў зняволенні дзеяча польскай дыяспары, журналіста, як і навучанне агрэсіўных мігрантаў зʼяўляюцца непрымальнымі для польскага боку.
Нядаўна намеснік Сікорскага Анджэй Шэйна назваў тры ўмовы для аднаўлення адносін паміж Варшавай і Мінскам: спыненне гібрыдных атак на мяжы, вызваленне Анджэя Пачобута і выдача мігранта, які падазраецца ў забойстве польскага салдата.
Польшча і Беларусь вядуць перамовы аб вызваленні Пачобута. Як не будзе выніку — закрыюць межы — Radio ZET
Намеснік кіраўніка МЗС Польшчы назваў тры ўмовы нармалізацыі адносін з Мінскам
Дональд Туск прызнаў зніжэнне міграцыйнага ціску на польска-беларускай мяжы
Сталі вядомыя падрабязнасці сустрэчы Дуды і Сі Цзіньпіна наконт рэжыму Лукашэнкі
Каментары