Афіцыйны прадстаўнік МЗС Расіі Марыя Захарава заявіла, што расійскія ўлады не будуць удзельнічаць у саміце міру, які да канца 2024 года плануе арганізаваць Украіна.
Паводле яе слоў, саміт міру не мае нічога агульнага з урэгуляваннем расійска-ўкраінскага канфлікту. Яна назвала яго «чарговай праявай махлярства англасаксаў і іх украінскіх марыянетак».
«Так званы другі саміт мае ўсё тую ж мэту — працягнуць абсалютна нежыццяздольную «формулу Зялёнскага» ў якасці безальтэрнатыўнай асновы рашэння канфлікту, дамагчыся яе падтрымкі з боку сусветнай большасці і ад яе імя прад'явіць Расіі ўльтыматум аб капітуляцыі. Мы ў такіх «самітах» удзельнічаць не будзем», — заявіла прадстаўнік МЗС Расіі.
Захарава дадала, што расійскія ўлады «не адмаўляюцца ад палітыка-дыпламатычнага ўрэгулявання крызісу» і гатовы да абмеркавання «сапраўды сур'ёзных прапаноў, якія ўлічваюць сітуацыю «на зямлі».
Прэзідэнт Расіі Уладзімір Пуцін 14 чэрвеня назваў умовы для мірных перагавораў. Згодна з ім, Украіна павінна заявіць аб поўным вывадзе войскаў з тэрыторыі Данецкай, Луганскай, Херсонскай і Запарожскай абласцей і пачаць рэальны вывад войскаў, а таксама афіцыйна заявіць аб адмове ад планаў па ўступленні ў НАТА. Імаверна, гэта Захарава называе прапановамі, якія ўлічваюць сітуацыю «на зямлі».
20 верасня прэзідэнт Украіны Уладзімір Зяленскі заявіў, што Кіеў актыўна працуе над планам перамогі і падрыхтаваў тры пункты для размовы з Расіяй. Паводле яго слоў, саюзнікі Украіны згодны з тым, што на другі саміт міру неабходна паклікаць прадстаўнікоў расійскага боку. «І, як мы сказалі, у пачатку лістапада ўвесь план будзе гатовы. Гэта будзе старт і падмурак для таго, каб размаўляць у любым фармаце з Расіяй. У любым фармаце, з любымі яе прадстаўнікамі, таму што будзе план і будзе што паказаць», — сказаў Зяленскі.
Падрабязнасці гэтых планаў украінскага боку невядомыя.
Цяпер чытаюць
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх17
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары