Беларусі трэба і далей «умацоўваць сваю абараназдольнасць і гатоўнасць супрацьстаяць суперніку ў выпадку ваеннай агрэсіі», заявіў на Абуз-Лясноўскім ваенным палігоне Аляксандр Лукашэнка, піша БелТА.
«Старая формула: хочаш міру — рыхтуйся да вайны. Яшчэ раз хачу падкрэсліць (хоць чаго нам тут перад кімсьці апраўдвацца), што мы не збіраемся ваяваць, не хочам ваяваць… усё гэта ўжо сказана. Гэта слухаюць, але робяць сваю справу — нашы праціўнікі, нашы супернікі. Тыя, хто рыхтуецца супраць нас, будзем прама казаць, ваяваць.
Таму нам трэба рыхтавацца да вайны. І дай бог, каб гэтай вайны не было. Якой бы ні была вострай абстаноўка вакол Беларусі, мы пакуль не назіраем тэндэнцый да развязвання супраць нас вайны», — заявіў Лукашэнка.
Аляксандр Лукашэнка адзначыў, што, улічваючы вопыт як падзей на фронце ва Украіне, так і ваенных канфліктаў за апошнія гады ў свеце, у Беларусі ўжо чатыры разы рэфармавалі армію. «Гэта ўжо, напэўна, у пяты раз падыходзім да мадэрнізацыі ўласных узброеных сіл», — заўважыў ён.
Таксама было прадстаўлена шмат навінак у сферы беспілотных лятальных апаратаў. Разам з тым, хоць беспілотнікі і могуць сур'ёзна паўплываць на ход вайны, без падрыхтаваных салдат і надзейнай зброі эфектыўна абараняцца не атрымаецца.
«Таму так, беспілотнікі — гэта сур'ёзная навінка. Так, яна, напэўна, вайну, калі раптам здарыцца, назад не паверне. Але значна паўплывае на ход ваенных дзеянняў. Беспілотнікі — справа сур'ёзная. Справа, як вайскоўцы кажуць, вельмі эфектыўная і выгадная з пункту гледжання вайны. Страшна так казаць, але тым не менш. Сёння, як я казаў, ваюючыя бакі не шкадуюць беспілотнікаў для таго, каб паляваць за адным чалавекам (гаворка пра шараговых вайскоўцаў.). Бо гэта танней, чым падрыхтаваць байца. Таму так — беспілотнікі».
Таксама Лукашэнка даручыў «актуалізаваць задачы тэрытарыяльнай абароны з улікам сучасных умоў вядзення баявых дзеянняў».
«І народнае апалчэнне — каб чалавек, які не трапляе ў войска, але добра валодае зброяй, мог абараніць дом. Сістэма ў нас вызначана. Мы яе правяраем: дзяржсакратару задача пастаўлена жалезна, каб усё было праверана не для паказухі, пачынаючы ад народнага апалчэння да Узброеных сіл. Гэта значыць сістэма абароны нашай краіны ў нас створаная», — сказаў палітык.
Каментары