Квадробераў прыдумалі, каб яны прынеслі Захаду ў зубах суверэнітэт Беларусі — новая версія прапаганды

Квадробіка — рух родам з Японіі. Адэпты гэтай субкультуры капіююць паводзіны жывёл, часцей за ўсё, катоў і сабак. Яны бегаюць на карачках, выдаюць гукі, падобныя да гукаў жывёл, надзяваюць маскі і хвасты. Некаторыя спрабуюць нават есці корм жывёл. Зрэшты, у Беларусі нядаўна з'явіўся бяспечны корм спецыяльна для квадробераў.

Гэтая дзіцячая забава, мяркуючы па ўсім, сур'ёзна турбуе беларускіх прапагандыстаў. У адным з матэрыялаў, напрыклад, квадробіку назвалі «першым крокам да сатанізму». Цяпер жа з'явілася яшчэ адна, не менш выдатная, версія.

Канал «Невальфовіч», які, меркавана, вядуць спецыялісты з ідэалагічнага ўпраўлення Мінабароны, выклаў уласную аналітыку гэтай з'явы. І прыйшоў да зусім нечаканых высноў.

Хоць у пачатку артыкула яго аўтар прызнае, што для дзяцей 7-12 гадоў нічога страшнага ў квадробіцы няма — гэта звычайная ролевая гульня, уласцівая дзецям гэтага ўзросту. А вось дзецям старэйшым, якія спрабуюць есці корм для жывёл, прапануюць звярнуцца да спецыялістаў.

А далей пачынаецца тое, дзеля чаго гэты артыкул і рыхтавалі. Аказваецца, квадробінг — гэта, ні шмат ні мала, інструмент Захаду па прыгнёце іншых народаў. 

На думку ананімнага аўтара, квадробінг актыўна падтрымліваецца ў Еўропе і нават навязваецца ў якасці грамадскай нормы. У прыклад прыводзіцца марш квадробераў, які прайшоў у польскім Уроцлаве.

Прапагандысты лічаць, што працуе тая ж самая тэхналогія, што і ў выпадку з рухам ЛГБТ, які, як яны лічаць, Захад навязаў іншым народам раней.

«Як ЛГБТ, рух квадробераў прыйшоў да нас з-за мяжы. Быў гэта «спорт» або чыясьці «блогерская» задумка, але заходнія каштоўнасці і культура, якая навязваецца, актыўна знішчаюць выхаванне і маральнасць народаў», — лічыць аўтар канала.

Галоўная задача ўсяго гэтага, вядома ж, адна: пазбавіць Беларусь суверэнітэту.

«Захад у «гульнявой форме» ставіць нашых дзяцей на калені, забірае індывідуальнасць і гістарычныя каштоўнасці, корміць як жывёл. Апошнім крокам можа стаць суверэнітэт краіны, які «людзі-жывёлы» ў зубах прынясуць па камандзе Захаду?» — пытаецца аўтар артыкула.

Якім чынам дзеці ў касцюмах катоў і сабак змогуць здаць суверэнітэт Захаду і як гэты механізм працуе, у матэрыяле не тлумачыцца.

Дыскусія пра квадробераў ужо некаторы час вядзецца ў публічнай прасторы. Напрыклад, псіхатэрапеўт, з якім размаўляла «Наша Ніва», лічыць, што такая гульня не можа нашкодзіць псіхіцы падлетка і траўмаваць яе, як гэта падаецца ў дзяржаўных СМІ:

«Дзецям патрэбныя гульні, таму што ў гульнявой форме яны вучацца быць дарослымі. Гульня — найважнейшая частка развіцця чалавека. Трывожныя формы гэта можа набываць у выпадку, калі дзіця праводзіць такім чынам залішне шмат часу. Калі ў жыцці застаюцца адны забавы».

На абарону квадробераў і хобіхорсераў нядаўна ўстаў нават прадстаўнік праваслаўнай царквы. Экс-прэс-сакратар БПЦ протаіерэй Сергій Лепін прапанаваў стварыць Сінадальны аддзел па ўзаемадзеянні з квадроберамі, па аналогіі з аддзелам па працы з казакамі: «Іх (квадробераў) больш».

• 0
• 0
• 3
• 4
• 0
• 0
• 0
• 0