У сярэдзіне лістапада, цалкам адбыўшы тэрмін, выйшаў на волю доктар-неўролаг Аляксандр Цялега, паведамляе «Вясна». Ён правёў у зняволенні больш за тры з паловай гады.
Аляксандр Цялега
Аляксандр Цялега — лекар-неўролаг з Барысава. Ён працаваў у расійскім Нарыльску, а на радзіму прыехаў у красавіку 2021 года ў адпачынак.
Затрыманы Цялега быў 3 мая 2021 года ў Барысаве за абразу прадстаўнікоў праваахоўных органаў. Супраць яго пачалі крымінальную справу (арт. 369 КК).
У судзе Ленінскага раёна Гродна 21 студзеня 2022 года Аляксандра асудзілі да чатырох гадоў калоніі за каментары ў інтэрнэце.
Падчас разгляду справы стала вядома, што ён пакінуў 32 каментары ў дачыненні да чыноўнікаў, сярод іх — камандзір мінскага АМАПа Дзмітрый Балаба, памочніца пракурора Фрунзенскага раёна Мінска Аліна Касьянчык, суддзя суда Фрунзенскага раёна Мінска Марыя Ярохіна, намеснік генпракурора Аляксей Стук. Аляксандр растлумачыў на судзе, што ён валанцёрыў пад Акрэсціна падчас жнівеньскіх пратэстаў, таму яго перапаўнялі эмоцыі і ён так шмат каментаваў. На судзе стала вядома, што адзін з пацярпелых па справе збіваў Цялегу пры затрыманні.
1 лістапада 2022 года над палітвязнем распачаўся новы працэс у судзе Пухавіцкага раёна, зноў за каментары. У выніку суд прызначыў яму адзін год зняволення, але шляхам паглынання больш строгага пакарання менш строгім тэрмін пакінулі ранейшым. Адбываў тэрміны Цялега ў Бабруйскай і Івацэвіцкай калоніях.
Сёлета ў красавіку Аляксандру ўзмацнілі рэжым пакарання і перавялі на турэмны рэжым у Магілёў.
У дакументах па «справе Эпштэйна» знайшлі сляды буйных грашовых пераводаў у Мінск. Зноў усплыло імя Карыны Шуляк44
Каментары