Былога кіраўніка БПЦ падазраюць у «спрыянні захопу храмаў» на акупаваных тэрыторыях Украіны
Служба бяспекі Украіны (СБУ) завочна выставіла падазрэнне ў здзяйсненні злачынства расійскім святарам, якія «спрыялі захопу храмаў на часова акупаваных тэрыторыях Украіны», паведамляе прэс-служба ведамства. Гаворка ідзе ў тым ліку пра цяперашняга мітрапаліта Круціцкага і Каломенскага, Патрыяршага намесніка Маскоўскай мітраполіі Паўла, частка біяграфіі якога звязаная з Беларуссю.
У паведамленні СБУ адзначаецца, што ведамства сабрала
«маштабную доказную базу на чатырох высокапастаўленых расійскіх клірыкаў, якія распаўсюджваюць крамлёўскі рэжым на часова акупаванай частцы тэрыторыі Украіны».
Усім чацвярым завочна паведамлена, што яны з'яўляюцца падазраванымі ў здзяйсненні злачынства па ч. 5 арт. 27, ч. 3 арт. 110 КК (спрыянне ў здзяйсненні наўмысных дзеянняў з мэтай змены межаў тэрыторыі або дзяржаўнай мяжы Украіны, па папярэдняй змове групай асоб, якія прывялі да іншых цяжкіх наступстваў).
«Цяпер працягваюцца комплексныя мерапрыемствы для прыцягнення зламыснікаў да адказнасці за злачынствы супраць нашай дзяржавы», — гаворыцца ў паведамленні СБУ.
Сярод гэтых чатырох асоб фігуруе і цяперашні мітрапаліт Круціцкі і Каломенскі, Патрыяршы намеснік Маскоўскай мітраполіі Павел. У Беларусі ён вядомы як кіраўнік Беларускай праваслаўнай царквы Маскоўскага патрыярхату з 2013 года па 25 жніўня 2020-га.
17 жніўня 2020 года, праз восем дзён пасля прэзідэнцкіх выбараў, прэс-служба БПЦ паведамляла, што «адбыўся пастырскі візіт» мітрапаліта Паўла ў сталічную бальніцу хуткай медыцынскай дапамогі, у якой знаходзіліся «людзі, якія атрымалі траўмы падчас акцый пратэсту, якія прайшлі ў пачатку мінулага тыдня», у тым ліку «тыя, якія паступілі са слядамі збіцця і цяжкіх цялесных пашкоджанняў з ізалятара часовага ўтрымання на вуліцы Акрэсціна».
Пацярпелым Павел тады паведаміў, што ў Царкве моліцца аб іх «больш хуткім выздараўленні», і выказаў надзею на «справядлівае расследаванне злачынстваў, учыненых падчас нядаўніх пратэсных акцый».
Неўзабаве пасля таго Паўла знялі з пасады кіраўніка БПЦ і адправілі спярша на Кубань, а пазней прызначылі на цяперашнюю вельмі прэстыжную ў іерархіі РПЦ пасаду. Акрамя таго, ён стаў членам Свяшчэннага сінода РПЦ, і менавіта праз гэта, як сцвярджае СБУ, меў дачыненне да захопу маёмасці ўкраінскіх епархій.
Акрамя мітрапаліта Паўла, пад падазрэнне СБУ трапілі таксама іншыя тры члены Свяшчэннага сінода РПЦ: кіраўнік Санкт-Пецярбургскай мітраполіі — мітрапаліт Варсанофій (Анатолій Судакоў), кіраўнік аддзела знешніх царкоўных сувязяў РПЦ мітрапаліт Антоній (Антон Сяўрук), і кіраўнік справамі Маскоўскай патрыярхіі мітрапаліт Дыянісій (Пётр Парубай).
«Нашы свецкія людзі — больш прыстойныя і сумленныя за архірэяў, якія даўно забыліся, як павінны рабіць вернікі». Апублікавалі «духоўны запавет» уладыкі Арцемія
Патрыярх Кірыл заклікаў не баяцца ядзернай зброі, таму што хрысціян не страшыць канец свету
Кіраўнік РПЦ паабяцаў расіянам вечнае жыццё ў выпадку гібелі ва Украіне і заклікаў маліцца за Пуціна
Каментары