У сераду Касацыйны суд Францыі канчаткова зацвердзіў абвінаваўчы прысуд, вынесены Нікаля Сарказі па «справе аб праслухоўках», заведзенай у 2014 годзе ў выніку праслухоўвання тэлефонных размоў экс-прэзідэнта з яго адвакатам Цьеры Эрзагам.
У першай інстанцыі вердыкт быў вынесены ў 2021 годзе. У траўні 2023 года прысуд, аспрэчаны экс-прэзідэнтам, пацвердзіў Апеляцыйны суд. Гэтае рашэнне Сарказі абскардзіў у вышэйшай і апошняй інстанцыі-касацыйным судзе, які і паставіў фінальную кропку ў судовым працэсе, піша Rfi.
Сарказі разам з двума іншымі абвінавачанымі — сваім былым адвакатам Цьеры Эрзагам і былым памочнікам генпракурора пры касацыйным судзе Жыльбэрам Азіберам — канчаткова прысуджаны за карупцыю і гандаль уплывам.
Усім тром прызначана аднолькавае асноўнае пакаранне: тры гады пазбаўлення волі (з іх — два гады ўмоўна) з адбываннем гадавога тэрміну па месцы жыхарства з электронным бранзалетам (фактычна — хатні арышт).
Нікаля Сарказі таксама забаронена на працягу трох гадоў галасаваць, вылучаць сваю кандыдатуру на выбарах ці займаць пасады ў сістэме юстыцыі.
На канчатковы прысуд па справе аб праслухоўках экс-прэзідэнт Сарказі адрэагаваў чарговым адмаўленнем сваёй віны:
«Я хачу яшчэ раз заявіць пра сваю поўную невінаватасць і па-ранейшаму перакананы ў сваёй праваце ў гэтай справе. У гэтай справе, як і ў іншых, я перапоўнены рашучасці. Праўда ў рэшце рэшт пераможа. Калі гэта адбудзецца, усе панясуць адказнасць перад французскім народам»»
Умоўная частка тэрміну (два гады), прызначаная Сарказі, можа быць заменена рэальным пазбаўленнем волі, калі асуджаны на працягу пяці гадоў здзейсніць новае правапарушэнне.
Умовы адбыцця гадавога пакарання пад «хатнім арыштам з электронным наглядам» (бранзалетам) вызначыць суддзя па выкананні пакаранняў, які павінен выклікаць Сарказі позвай на працягу 20 дзён. Суддзя павінен вызначыць, у якія гадзіны асуджаны будзе мець права пакідаць свой дом (напрыклад, каб працягваць сваю працоўную дзейнасць).
Паколькі 28 студзеня Сарказі споўніцца 70 гадоў, ён зможа, згодна з законам, падаць прашэнне аб умоўна-датэрміновым вызваленні да таго, як адбудзе палову тэрміну (такое права прадугледжана для асуджаных старэйшых за 70 гадоў).
Хадайніцтва аб УДВ можа быць пададзена на самай першай сустрэчы з суддзёй па выкананні пакаранняў ці пазней. Яно будзе разгледжана, але не абавязкова задаволена, адзначаюць юрысты.
Цяпер чытаюць
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м37
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1212
Каментары