Хваробу Альцгеймера звязалі з вірусам герпесу, які ёсць у большасці людзей
Навукоўцы лічаць, што спрыяць развіццю хваробы Альцгеймера можа барацьба арганізма з гэтым невылечным вірусам.
Да такіх высноў прыйшлі даследчыкі з Пітсбургскага ўніверсітэта, піша «Хайтек».
У мозгу пацыентаў былі знойдзены бялкі віруса простага герпесу першага тыпу (ВПГ-1) побач з характэрнымі для захворвання скучанасцямі тау-бялку ў найбольш уразлівых зонах мозгу.
Як вірус уплывае на мозг?
Эксперыменты на лабараторных мадэлях мозгу чалавека паказалі, што вірус герпесу можа ўплываць на ўзровень тау-бялка. Спачатку гэта з’яўляецца ахоўным механізмам, які змяншае гібель нейронаў пасля віруснай інфекцыі. Аднак з цягам часу такая абарона можа прывесці да пашкоджання мозгу.
«Наша даследаванне змяняе ўяўленне пра тау-бялок як выключна шкодны фактар. Мы паказалі, што ён можа быць часткай імуннай абароны мозгу», — адзначыў кіраўнік даследавання Ор Шэмеш.
Невядомыя механізмы
Тым не менш, дакладныя механізмы, праз якія вірус ВПГ-1 спрыяе развіццю хваробы Альцгеймера, пакуль не вывучаны. Навукоўцы плануюць працягнуць даследаванні, каб распрацаваць метады лячэння, накіраваныя на барацьбу з віруснымі бялкамі або рэгуляцыю імуннага адказу мозгу.
Шырокая распаўсюджанасць ВПГ-1
Паводле ацэнак Сусветнай арганізацыі аховы здароўя (СААЗ), 3,8 млрд чалавек ва ўзросце да 50 гадоў (64%) заражаны вірусам ВПГ-1. У большасці выпадкаў заражэнне адбываецца ў дзяцінстве, і вірус захоўваецца ў арганізме на ўсё жыццё, знаходзячыся ў нервовых клетках у стане актыўнасці або бяздзейнасці. Пакуль не існуе лячэння, якое здольнае цалкам знішчыць вірус.
Каментары