Унеслі змены ў Інструкцыю аб ажыццяўленні аперацый з банкаўскімі плацежнымі карткамі і плацежнымі інструментамі, якія забяспечваюць іх выкарыстанне. Пастанова праўлення Нацбанка апублікаваная на Нацыянальным прававым партале і ўступіць у сілу з 22 мая, піша Office Life.
Як патлумачылі ў прэс-службе рэгулятара, канкрэтызаваныя пытанні кампраметацыі картак, удакладнены парадак блакавання і разблакавання плацежных інструментаў, у тым ліку па прычыне кампраметацыі. Акрамя таго, канкрэтызавалі пытанні, якія тычацца выпадкаў прызнання аперацый з выкарыстаннем картак неаўтарызаванымі.
Інструкцыя замацоўвае, што банкі абавязаныя выпускаць у абарачэнне карткі на фізічных носьбітах толькі з чыпам стандарту EMV. Прычым банкі павінны забяспечваць магчымасць шматфактарнай аўтэнтыфікацыі пры аперацыях у інтэрнэце.
Для інфармавання кліента аб праведзеных з выкарыстаннем карткі аперацыях банкі павінны папярэдне атрымліваць згоду на аказанне такой паслугі. Пры гэтым паслуга інфармавання можа аказвацца як бясплатна, так і платна.
У інструкцыі прапісана, што банкі абавязаныя паведамляць кліентам пра абмежаванні пераліку, сум або колькасці аперацый з выкарыстаннем картак, а таксама пра змену спісу краін і рэгіёнаў, у якіх уведзеныя абмежаванні па картках. Цяпер такое інфармаванне банкі робяць на добраахвотнай аснове.
Яшчэ адна змена — да заключэння дамовы банк павінен будзе праінфармаваць кліента пра крымінальную адказнасць за распаўсюджванне рэквізітаў картак або аўтэнтыфікацыйных даных, па якіх магчымае атрыманне доступу да рахункаў. Рэгулятар лічыць, што гэта дасць магчымасць павысіць веданне кліентаў, у тым ліку непаўналетніх, пра наступствы неправамерных дзеянняў з карткамі.
Інструкцыю таксама дапоўнілі нормай, па якой банк-эмітэнт вызначае парадак дзеянняў са знойдзенымі карткамі, выпушчанымі гэтым банкам. Пры вызначэнні названага парадку дзеянняў банк-эмітэнт прадугледжвае блакаванне такіх картак па сваёй ініцыятыве як скампраметаваных.
У Нацбанку дадалі, што змены ўлічваюць прапановы грамадзян і банкаў і дапамогуць павысіць бяспеку аперацый па картах, а таксама палепшыць якасць аказання плацежных паслуг у цэлым.
Каментары