«Я кажу за Пуціна, ведаючы яго характар». Яшчэ адно выказванне Лукашэнкі аказалася пшыкам
Прызнанне Масквой удзелу паўночнакарэйскіх войскаў у баях ва Украіне ставіць Аляксандра Лукашэнку ў цікавае становішча.
«Лухта! Гэта эскалацыя ваеннага канфлікту. Ніколі Пуцін не пойдзе на тое, каб каго-небудзь угаворваць, каб узброеныя сілы якой-небудзь краіны ўблытваліся ў СВА і ў канфлікт ва Украіне, асабліва, як кажуць вайскоўцы, «на перадавой», на лініі сутыкнення», — казаў Аляксандр Лукашэнка ў інтэрв'ю Бі-Бі-Сі.
Гэта было ў кастрычніку 2024 года, стэнаграма размовы яшчэ вісіць на афіцыйным сайце.
«То-бок КНДР не адпраўляе сваіх вайскоўцаў?» — удакладніў журналіст Стывен Розенберг.
«Я ў гэта не веру. І ўчора паўночнакарэйцы заявілі, што гэта варажба на кававай гушчы. Ніколі такіх размоў і перамоў не было.
Я кажу за Пуціна, ведаючы яго характар. У Расіі насельніцтва хапае, каб весці ваенныя дзеянні», — пераконваў Аляксандр Лукашэнка.
«Калі гэта [удзел войск КНДР у канфлікце] пацвердзіцца, вас хвалюе такая сітуацыя?» — не адставаў Розенберг.
«Гэта будзе крок да нейкай эскалацыі канфлікту, калі на лініі сутыкнення з'явяцца чыесьці ўзброеныя сілы, нават беларускія. Нават калі б мы ўвязаліся ў вайну, гэта быў бы шлях да эскалацыі. Бо вы, англасаксы, адразу б заявілі, што ў канфлікт уцягнулася саюзная краіна, значыць, НАТА мае права дапамагчы Украіне. Значыць, натаўскія войскі былі б уведзеныя ва Украіну. Магчымы такі варыянт? Магчымы. Пуцін і гэты варыянт пралічвае — трэба яму гэта ці не. Але вы кажаце пра КНДР — дзе Карэя, а дзе Беларусь? Пуцін ніколі перад мной не ставіў пытанне аб тым, каб мы ўвязаліся ў гэтую бойку. Ні ён, ні Шайгу, ні цяперашні міністр абароны Белавусаў. Ніколі не ставілі перад намі такое пытанне», — заяўляў Аляксандр Лукашэнка.
Раней вялікі розгалас набылі выказванні Аляксандра Лукашэнкі пра тое, што вайна скончыцца за тры-чатыры дні і з якіх кірункаў на Беларусь рыхтаваўся напад.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары