У польскі суд накіравалі справу беларуса, абвінавачанага ў ДТЗ з шасцю пацярпелымі
Польская пракуратура завяршыла расследаванне і накіравала ў суд справу аб дарожна-транспартным здарэнні, якое адбылося 9 чэрвеня 2024 года ў Варшаве. Абвінавачваюцца два чалавекі: грамадзянін Беларусі Генадзь А. і грамадзянін Польшчы Міхал С., піша Reform.news.
Беларуса вінавацяць у тым, што, паварочваючы налева на аўтамабілі Toyota, ён не прапусціў BMW, які рухаўся на зялёнае святло, хоць і з перавышэннем хуткасці — ад 86 да 114 км/г пры дазволеных 50.
У выніку сутыкнення BMW вылецеў на пешаходны пераход, дзе шэсць чалавек чакалі зялёнага сігнала, а яшчэ пяцёра ішлі па тратуары. У аварыі пацярпелі шэсць чалавек: адзін атрымаў цяжкія траўмы, трое — сярэдняй ступені, астатнія — лёгкія.
Польскага кіроўцу абвінавачваюць у тым, што ён быў за рулём пад уздзеяннем наркотыкаў — у яго арганізме знайшлі какаін — і таксама парушыў правілы дарожнага руху, што стала прычынай аварыйнай сітуацыі.
Следства лічыць, што беларус не быў дастаткова ўважлівым пры павароце і гэта стала непасрэднай прычынай аварыі. Пры гэтым дзеянні польскага кіроўцы таксама паўплывалі на сітуацыю — ён ехаў занадта хутка, чым мог увесці ў зман іншага шафёра.
На першапачатковым допыце беларус прызнаў віну і даў тлумачэнні, але пазней адмовіўся ад прызнання віны. Польскі грамадзянін таксама сваёй віны не прызнаў.
Беларусу пагражае ад 6 месяцаў да 8 гадоў пазбаўлення волі. Польскаму кіроўцу — да 16 гадоў за аварыю і дадаткова да 3 гадоў за кіраванне аўто пад наркотыкамі.
Каментары