У мінскім рэстаране з безлімітам вісяць аб'явы аб штрафах за недаедзеную ежу. Уладальнік кажа, што так выхоўвае кліентаў
Новыя правілы ў рэстаране з безлімітнай ежай здзівілі наведвальнікаў, бо гучаць яны не зусім законна.
Рэстаран з безлімітнай азіяцкай ежай UMI адкрыўся ў ГЦ «Чэрвеньскі» ў маі і адразу трапіў у навіны. У дзень адкрыцця каля ўстановы выстраілася вялізная чарга, натоўп размёў усю ежу за некалькі гадзін. Некаторыя нават прыходзілі з кантэйнерамі для ссабоек.
З наплывам кліентаў рэстаран справіўся, але цяпер, відаць, з'явілася іншая праблема. У сеціве актыўна абмяркоўваюць новае і не зусім звычайнае правіла, якое ўвялі ва ўстанове. Там развесілі аб'яву аб штрафах за недаедзеную ежу, пiша «Анлайнер».
«У нашым рэстаране падтрымліваецца прынцып: «Бяры столькі, колькі з'ясі». Пры пакіданні ежы больш за 300 грамаў спаганяецца плата за 1 порцыю комплекснага меню (з разліку кожныя 300 г): абед (12:00—15:30) — 35 руб / 300 г, вячэра (17:30—22:00) — 49 руб / 300 г. Прыклад: калі рэшта 600 г — аплачваецца 2 порцыі па цяперашнім тарыфе», — гаворыцца ў аб'яве.
Папера выклікала ў наведвальнікаў нямала пытанняў. Напрыклад, як ежу ўзважваюць, ці сапраўды будуць браць грошы за недаедзенае і што рабіць, калі ежа проста не спадабалася? Узніклі пытанні і пра законнасць такіх новаўвядзенняў — бо госць ужо аплаціў уваход і можа выбіраць ежу на свой густ.
Аказалася, у рэальнасці ніякіх штрафаў няма. Уладальнік рэстарана Арцём Стрыгін растлумачыў, што гэтая аб'ява — перш за ўсё выхаваўчы момант.
«Мы нікога не штрафуем — ні з аднаго чалавека не ўзялі ні капейкі. Гэтую аб'яву павесілі хутчэй як выхаваўчую меру. Каб госці не бралі больш, чым маглі з'есці.
З пункту гледжання закона спаганяць плату за недаедзеную ежу неправамерна, і мы гэта добра разумеем. Пасля таго як мы павесілі гэтую аб'яву, наведвальнікі сталі больш свядома падыходзіць да выбару і памеру ежы. Колькасць харчовых адкідаў значна знізілася — з 30 мяхоў смецця ў дзень да прыкладна 10», — пахваліўся вынікамі акцыі рэстаратар.
Уладальнік установы паабяцаў, што ў хуткім часе з'явіцца сістэма матывацыі. Напрыклад, калі за сталом у гасцей застанецца менш за 300 грамаў ежы на чалавека, то яны атрымаюць зніжку 10 рублёў.
Цяпер чытаюць
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма1
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу1818
Каментары