Святлана Ціханоўская сустрэлася з легендарным украінскім футбалістам Андрэем Шаўчэнкам
Сустрэча адбылася ў Нью-Ёрку ў рамках уручэння ўзнагароды Atlantic Council Global Awards, дзе былі кіраўнік Міжнароднай федэрацыі футболу Джані Інфанціна, прэзідэнт Францыі Эмануэль Макрон і прэзідэнт Аргенціны Хаўер Мілей.
Святлана Ціханоўская сустрэлася з Андрэем Шаўчэнкам — легендарным украінскім футбалістам, уладальнікам Залатога мяча і прэзідэнтам Украінскай асацыяцыі футбола, паведаміў «Нашай Ніве» дарадца дэмакратычнай лідаркі Дзяніс Кучынскі.
Сустрэча адбылася ў Нью-Ёрку ў рамках уручэння ўзнагароды Atlantic Council Global Awards, дзе былі кіраўнік FIFA Джані Інфанціна, прэзідэнт Францыі Эмануэль Макрон і прэзідэнт Аргенціны Хаўер Мілей.
На цырымоніі Святлана Ціханоўская разам з Сяргеем Ціханоўскім і сваімі дарадцамі сустрэлася з Андрэем Шаўчэнкам. Яны правялі некалькі гадзін за адным сталом падчас цырымоніі.
Ціханоўская падзякавала Андрэю Шаўчэнку за прынцыповую пазіцыю і падтрымку Украіны. Яна адзначыла яго дзейнасць як амбасадара дзяржаўнай ініцыятывы UNITED24, якая сабрала мільёны еўра на медыцынскія і гуманітарныя патрэбы, і як пазаштатнага дарадцы прэзідэнта Украіны Уладзіміра Зяленскага.
Шаўчэнка адкрыта падкрэслівае, што спорт не можа быць па-за палітыкай, і выступае за тое, каб расійскія і беларускія праўладныя спартоўцы былі адхіленыя ад міжнародных спаборніцтваў.
Ён арганізаваў разам з футбалістам Аляксандрам Зінчанкам Game4Ukraine у Лондане, сродкі з якога пайшлі на аднаўленне школы ў Чарнігаўскай вобласці, а таксама ўдзельнічае ў дабрачынных аўкцыёнах і праграмах падтрымкі ўкраінскіх дзяцей-бежанцаў.
У размове з Андрэем прадстаўнікі Ціханоўскай таксама падкрэслілі, што ў Беларусі ў 2020 годзе шмат спартоўцаў выступілі супраць дыктатуры, адмовіліся ўдзельнічаць у лукашэнкаўскіх турнірах і паказалі, што спорт не ёсць па-за палітыкай. Таму вельмі важна падтрымліваць і беларускіх спартоўцаў, якія мелі мужнасць адкрыта заявіць пра сваю пазіцыю, адзначыў Дзяніс Кучынскі.
Цяпер чытаюць
Пра Мелказёрава ў яго апошні дзень: «Было адчуванне, што ён стомлены, бракуе энергіі, рысы твару былі запалыя»1
Каментары
Гэтаксама можна кінуць кліч - медыцына ня можа быць па-за палітыкай, адукацыя ня можа быць па-за палітыкай, транспарт, і т.д., выключыць іх з міжнародных кантактаў, зганьбіць усіх, хто там застаўся, і абвясьціць памагатымі антычалавечвга рэжыму, ды абкласьці пагардай.
Гэта ня правільны падыход. Нават у кірунку Паўночнай Карэі такі падыход не ўжываецца, а тая краіна не акупаваная ворагам, як Беларусь.
Рэжым робіць усё, каб у краіне не было ніякіх вольных грамадзкіх ініцыятываў, любы голас нязгоды душыцца, разгул тыраніі, тысячы палітзьняволеных, паўміл'ёна бежанцаў, а тых, хто ня зьбег, прапануюць во гнобіць за маўчаньне, прапануюць лічыць іх саўдзельнікамі рэжыму (тут - спартоўцаў), трымаць іх у абструкцыі...
А вы зможаце ім дапамагчы ? Ага, як жа, прыклад тысячаў зьняволеных адказвае на пытаньне за вас, спадар Шаўчэнка...