За апошнія 10 гадоў гадавы аб'ём здабычы нафты ў Беларусі вырас з 1,65 да 2 мільёнаў тон, паведаміў у інтэрв'ю часопісу «Экономика Беларуси» старшыня канцэрна «Белнафтахім» Ілля Ікан.
«Тэхнічнае пераўзбраенне дазволіла нарасціць аб'ёмы бурэння ў 2,4 разы (з 117 тысяч метраў да 285 тысяч метраў), у тым ліку давесці долю гарызантальнага бурэння з 0,5 да 19,5%, а таксама ў 2 разы павялічыць колькасць свідравін, якія ўводзяцца штогод, з 35 да 70 у год», — заявіў Ілля Ікан.
Паводле слоў кіраўніка канцэрна, беларускія нафтавыя радовішчы знаходзяцца на завяршальным, чацвёртым этапе распрацоўкі, таму для далейшага павелічэння аб'ёмаў здабычы неабходна ўкараняць інавацыйныя тэхналогіі, якія дазваляюць распрацоўваць цяжказдабывальныя запасы нафты.
Дзякуючы новым тэхналогіям сёння ў Беларусі паспяхова здабываецца нафта там, дзе раней гэта было немагчыма або нявыгадна. Здабыча з цяжказдабывальных запасаў значна вырасла: з 750 тысяч тон у 2019 годзе да 987 тысяч тон цяпер, што складае 49% ад агульнага аб'ёму здабычы.
Асноўны прырост забяспечваецца за кошт даразведкі і больш інтэнсіўнай працы на ўжо вядомых радовішчах, паколькі верагоднасць знаходжання буйных новых радовішчаў у Беларусі невялікая з прычыны яе геалагічнай вывучанасці.
Цяпер чытаюць
Памятаеце Данілу з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў і з чаго ўсё пачалося
Каментары