Некаторых мужчын у Беларусі запрашаюць здаць адбіткі пальцаў. Навошта?
Чытачы devby распавялі выданню пра тое, што іх запрашаюць у РАУС, каб зрабіць дактыласкапію.
15 кастрычніка журналісты devby апублікавалі гісторыю беларуса, якія цяпер жыве ў Польшчы і, нягледзячы на гэта, атрымаў на свой беларускі адрас запрашэнне зрабіць адбіткі пальцаў.
У паведамленні не гаварылася пра прычыны такой цікавасці да яго, затое была спасылка на закон № 236‑3 ад 4 лістапада 2003 года «Аб дзяржаўнай дактыласкапічнай рэгістрацыі». Для візіту яму далі тэрмін у паўтара тыдня, папярэдзілі, што ў выпадку няяўкі яго могуць прывесці прымусова.
Цяпер выданне ад чытачоў атрымала яшчэ некалькі паведамленняў пра запрашэнні да дактыласкапію:
«На мой адрас у Беларусі таксама прыйшоў лісток з патрабаваннем на працягу двух тыдняў з’явіцца на дактыласкапію. У паведамленні спасылка на закон аб дзяржаўнай дактыласкапічнай рэгістрацыі, без падрабязнасцей. Жыву ў іншай краіне, ВНЖ маецца, але спецыяльных паведамленняў аб ім я нікуды не слаў. Праўда год таму паказваў яго пры перасячэнні беларускай мяжы».
Такое ж запрашэнне атрымаў яго знаёмы, які жыве ў Беларусі і ВНЖ іншых краін не мае.
«І ўжо схадзіў у РАУС. Там яму расказалі, што выйшаў нейкі закон, які абавязвае прайсці дактыласкапію ўсіх ваеннаабавязаных (гэты закон выйшаў яшчэ ў 2003 годзе — devby). Нават тых, хто не служыў і ў каго ваенны білет на руках (гэта якраз мой выпадак).
Знаёмы спытаў, а што будзе з тымі, да каго не дазвоняцца/не дапішуцца. Яму адказалі, што, маўляў, будуць шукаць, але ніякіх абмежаванняў для тых, хто не прайшоў дактыласкапію, нібыта няма», — распавёў ён.
Дакладна такое ж паведамленне прыйшло і сваяку іншага чытача. Ён таксама жыве ў Беларусі, не служыў і мае ваенны білет на руках, працуе медыкам. То бок усе тры кейсы аб'ядноўвае статус ваеннаабавязанага без службы ў арміі, заўважае devby.
Другі чытач жыве за мяжой. Выклік на дактыласкапію ён атрымаў праз блізкага сваяка — таму патэлефанавалі на мабільны.
«Проста папрасілі мяне прыйсці на адбіткі. Падстаў не называлі, тэрмінаў таксама, таму што сваяк сказаў, што мяне няма ў краіне. ВНЖ у мяне ёсць, але дзяржава пра яго нічога не ведае. І я не ваеннаабавязаны: у мяне на руках ваеннік з вызваленнем па медыцынскіх падставах».
Мужчына мяркуе, што выклік звязаны з тым, што ён знаходзіцца ў статусе падазраванага па «народным артыкуле». Раней яго выклікалі на допыт.
Каментары
Фашысцкі закон, прыгонны.