Затрыманы Віктар Лемяшэўскі, партнёр Дзмітрыя Баскава па акумулятарным бізнэсе
Заснавальнік скандальнага акумулятарнага завода ў Брэсце не першы раз трапляе за краты. Мінулы раз яму ўдалося адкупіцца, але давялося прадаць бізнэс.
«Нашай Ніве» стала вядома пра затрыманне Віктара Лемяшэўскага, аднаго з найбагацейшых людзей Пінска. Ён займае 58‑е месца ў рэйтынгу самых паспяховых бізнэсменаў Беларусі.
56‑гадовы Лемяшэўскі — выпускнік аэракасмічнага факультэта Маскоўскага авіяцыйнага інстытута. Спачатку зарабляў у Пінску, пасля перайшоў на рэспубліканскі ўзровень.
У канцы 2010‑х Лемяшэўскі атрымаў вядомасць за кошт будаўніцтва скандальнага акумулятарнага завода ў Брэсце. Нягледзячы на пратэсты мясцовых жыхароў прадпрыемства ўсё ж дабудавалі.
Лемяшэўскі паспеў пасядзець некалькі месяцаў у СІЗА КДБ, пасля прадаў сваю долю ў заводзе, але ўрэшце вярнуўся ў акумулятарны бізнэс.
Яго камерцыйным партнёрам па прадпрыемстве «Акумулятарны альянс» стаў набліжаны да Лукашэнкі спартыўны функцыянер Дзмітрый Баскаў, які валодае 40% кампаніі. Іншыя 40% маюць Лемяшэўскі разам з яшчэ адным сваім партнёрам Аляксандрам Папком, а 20% прадпрыемства ў Брэсцкага аблвыканкама.
У чым сутнасць прэтэнзій сілавікоў да Лемяшэўскага і якая роля ў гэтым працэсе Дзмітрыя Баскава — пакуль не вядома.
У свой час бізнэс Лемяшэўскага развіваўся ў тым ліку пры спрыянні старшыні Следчага камітэта (2015-2021) Івана Наскевіча — былога пінскага пракурора, суседа і аднагодка Лемяшэўскага. Наскевіч цяпер працуе ў юрыдычнай асобе, якая кіруе холдынгам 1AK-Group, у які ўваходзіць і «Акумулятарны альянс».
«Наша Нiва» — бастыён беларушчыны
ПАДТРЫМАЦЬЦяпер чытаюць
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі26
Каментары