Беларусу, які намаляваў зігуючага Маска ў цэнтры Варшавы, далі два гады ўмоўна
Калі мастака яшчэ раз зловяць за стварэннем муралаў — умоўны тэрмін могуць замяніць на рэальны.
Два гады ўмоўнага пазбаўлення волi і штраф 160 злотых (44 даляры). Такое пакаранне прызначылі беларусу за малюнак зігуючага Ілана Маска ў Варшаве, паведамляе «Еўрарадыё».
Калі мастака яшчэ раз зловяць за стварэннем муралаў — умоўны тэрмін могуць замяніць на рэальны.
Учора на пасяджэнне Максім прыйшоў з адвакатам, перакладчыкам і знаёмымі: мужчынам і жанчынай. Мастак заўважна хваляваўся, але пры гэтым быў адзеты экстравагантна: у цішотку з уласным малюнкам зігуючага Маска, з надпісам наверсе Fuck Mask, а на твар нанёс словы Free Art. Мастак праз адваката заявіў, што яго нельга фатаграфаваць праз меры бяспекі.
Са словаў суддзі, якая зачытала сутнасць справы, на Максіма падалі ў суд уладальнікі будынку па вуліцы Эміліі Плятэр 47, абвінаваціўшы яго ў вандалізме і шкодзе маёмасці памерам 1944 злотых (530 даляраў). Мастак сябе вінаватым не прызнаў, пазоўшчыкі на пасяджэнне не прыйшлі.
Тлумачачы суддзі абставіны здарэння, свой учынак Максім прасіў трактаваць як праяву мастацтва.
«Я маю права на выказванне ўласнага меркавання з дапамогай мастацтва. І ў дадзеным выпадку гэта было вулічнае мастацтва».
Таксама беларус папрасіў звярнуць увагу на кантэкст падзей.
«Гэта быў студзень, і ў прэсе было шмат навінаў пра пэўныя змены ў настроях. У той момант Ілан Маск стаў вельмі папулярным у інтэрнэце як мем. Ён паказваў гэты жэст як прадстаўнік ураду прэзідэнта Дональда Трампа. Далей з’явілася інфармацыя, што Ілан Маск набывае люксавыя апартаменты ў Варшаве, насупраць вуліцы Плятэр. У тым хмарачосе, дзе знаходзіцца ГЦ «Злотэ Тарасы».
<…> Я не прымаю гвалт, баюся вайны і з’яўляюся даволі ўражлівым чалавекам, асабліва датычна вельмі багатых людзей і ўплывовых палітыкаў, жэсты якіх можна адназначна трактаваць. Мяне гэта ўражвае і я гэтага баюся».
Мастак зазначыў, што сваім жэстам Маск выказаў падтрымку фашыстам.
«Я спецыяльна не абіраў сцяну для малявання працы, але яна была ў добрым месце, каб праявіць сваю грамадзянскую пазіцыю».
Цяпер чытаюць
Былога вайскоўца з Брэста, які вярнуўся з Польшчы, абвінавацілі ў «тэрарызме» і адправілі ў калонію5
Каментары