«Спачатку нейкая дзяўчына на машыне збіла яго, потым на яго наскочылі хлопцы і далі па галаве». Хоць паліцыя заклікала не набліжацца да яго.
Апоўначы жыхары Коўна падзяліліся інфармацыяй аб затрыманні падазраванага ў здзяйсненні падвойнага забойства Бэнаса Мікутавічуса. Яго лавіў увесь горад, а затрымалі жанчыны.
Людзі ў дадатку Zello стварылі канал пад назвай «Raskime žudiką» (Знойдзем забойцу). Такі заклік зацікавіў людзей, паведамляе Delfi.lt.
Каля 24:00 жыхары Коўна паведамілі аб затрыманні падазраванага на вул. Калнечу. Паліцыя праінфармавала Delfi, што гэта праўда. Паведамляецца, што ў 23.50 гадзіны падазраваны быў затрыманы.
У мабільным дадатку Zello жыхары распавялі, як удалося затрымаць Мікутавічуса. «Усе пачалі крычаць, што бачаць яго на АЗС Viada, каля рэстарана. Усе хутка туды паехалі, пабеглі. І дакладна, гэта быў ён. Не ведаю, наколькі гэта праўда,
але кажуць, што спачатку нейкая дзяўчына на машыне збіла яго, потым на яго наскочылі хлопцы і далі па галаве», — распавялі людзі.
У заплечніку ў Мікутавічуса быў вялікі нож. У прыкладанні таксама дзеляцца інфармацыяй пра тое, што ўвесь дзень групы людзей патрулявалі ў раёне і шукалі падазраванага.
«Кватэры, інтэрнаты, закінутыя паркі і будынкі. Калі заўважылі падазраванага, ён кінуўся бегчы, пераскочыў праз агароджу, жанчыны злавілі і паклалі, выклікалі паліцыю», — пішуць у групе.
На месцы здарэння адзін удзельнік пошукаў распавёў Delfi падрабязнасці. «Усе дзяліліся, дзе знаходзяцца, і нейкая жанчына сказала, што ў гэтым парку, на вул. Калнечу, заўважыла падазронага чалавека ў чырвонай куртцы.
Яна павялічыла тэмп, мужчына кінуўся бегчы. Мы таксама туды паехалі <…>; ён ужо ляжаў на зямлі. Сказалі, што ў яго знайшлі тэлескапічную дубінку і нож. Адзін з удзельнікаў затрымання атрымаў струмень газу», — расказаў малады чалавек.
У Facebook дзеляцца відэа з затрыманнем падазраванага. На прэс-канферэнцыі ноччу паліцыя пацвердзіла, што падазраванага дапамаглі затрымаць жыхары. «З дапамогай жыхароў падазраваны быў затрыманы, зараз ён пад арыштам», — сказалі паліцэйскія.
«Паліцыя працавала на той жа вуліцы, у тым жа раёне. Проста людзей было больш, ім больш пашанцавала», — прызналі ахоўнікі парадку.
Мікутавічус не супраціўляўся, але спрабаваў бегчы. Хадзілі чуткі, што падазраваны адкусіў сабе язык падчас затрымання, аднак паліцыя не магла пацвердзіць гэтую інфармацыю, толькі сказала, што яго аглядалі дактары.
Цяпер чытаюць
«Чакаем у Мінску +1 славутасць!» Блогераў прывезлі ў былую турму на Валадарскага18
Каментары