Спявак Дзмітрый Калдун паказаў сваю мінскую кватэру недалёка ад Драздоў ШМАТ ФОТА
У беларускай сталіцы ў спевака ёсць нерухомасць у мікрараёне «Лебядзіны». Менавіта там атабарылася яго сям'я. Сам жа Дзмітрый Калдун жыве то ў Мінску, то ў Маскве.
Да сябе ў госці артыст запрасіў блогера, якія вядзе YouTube-канал «Рум Турыст».
Спявак расказвае, што ў гэтую кватэру на вуліцы Ратамскай пераехаў пасля таго, як дзеці больш-менш падраслі — у Дзмітрыя сын і дачка, таму для іх патрэбны былі асобныя пакоі (а ў мінулай кватэры быў агульны дзіцячы пакой).
Плошча кватэры Дзмітрыя — 117 квадратаў. Набыў кватэру ён з вольнай планіроўкай, дзе можна было зрабіць усё пад свае патрэбы.
Сам жыллёвы комплекс можна лічыць элітным — напрыклад, у суседнім доме атрымала кватэру Наталля Эйсмант, прэс-сакратарка Аляксандра Лукашэнкі. Побач купіла нерухомасць і яго фаварытка Дар'я Шманай. Ды і самі Дразды-2 з катэджамі чыноўнікаў прыкладна за кіламетр.
Чытайце: Наталля Эйсмант купіла апартаменты ў «Алімпік Парку» за $167 тысяч
На пытанне, якія былі праблемы з рамонтам, спявак паціскае плячыма. Маўляў, усім займалася жонка, таму ў яго асаблівых праблем не ўзнікала.
У вітальні можна заўважыць мноства дзіцячых малюнкаў і сувеніраў. Пра іх спявак неяк зняважліва кажа, што калекцыя належыць жонцы і дачцэ — бо «гэта яны любяць збіраць розны гломазд.
— Я, шчыра кажучы, нават не ведаю, як гэта ўсё называецца.
Жонка па-за кадрам падказвае: «Скулпанда».
Побач размешчаны і вялікі халадзільнік. Блогер пацікавіўся, чаму такое нестандартнае рашэнне. Дзмітрый адказаў, што ўсё лагічна: прыйшоў і адразу паеў.
Прадэманстраваў спявак і прыбіральню:
— Яе асаблівасць у тым, што тут столькі рэжымаў асвятлення, што я не ведаю, навошта гэта было зроблена. У кожнай кватэры, у якой робяць рамонт, потым усплываюць такія моманты, якія немагчыма растлумачыць. Незразумела, навошта на такой маленькай плошчы столькі святла.
Размове з блогерам крыху перашкаджае шум выцяжкі, і Дзмітрый трохі нервуецца праз тое, што не можа вызначыць, на які з выключальнікаў святла яна завязаная.
Спявак кажа, што такі дзіўны варыянт прапанаваў дызайнер. А свой выбар тлумачыць тым, што ў кожнага бываюць нейкія замарачэнні.
— Мне вось часам кажуць: «Вось вы казалі на інтэрв'ю…». А я адказваю: «А я быў не ў сабе». Вось так, імаверна, усе мы былі не ў сабе, калі на такое пагадзіліся.
Пралку ж схавалі ў гасцявой прыбіральні.
Велізарная гасцёўня сумешчаная з кухняй. Але цяпер Дзмітрый кажа, што лепш было б зрабіць адасобленую кухню. Бо калі прыходзяць госці, працэс гатавання становіцца адкрытым, а гэта не вельмі камфортна. Плюс пахі ежы (напрыклад, смажанай цыбулі) распаўсюджваюцца па ўсёй кватэры.
— Больш гатуе жонка Віка. Я магу зрабіць нешта простае — супы там ці дранікі. Ну і гарбату. Кухня атрымалася экстравагантнай. У тым сэнсе, што мы вырашылі зрабіць каменную стальніцу, у якой потым знайшлося як шмат пераваг, так і шмат хібаў. Вось, напрыклад, яна сколваецца па краях, калі нешта цяжкае ўпусціць ці нажом ударыць.
Ёсць і барная стойка. Не гледзячы на тое, што месца для захоўвання шмат, Дзмітрый скардзіцца: кажа, жонка набывае нейкія сумнеўныя прадукты харчавання.
— Віка любіць набываць розныя парашкі, сумесі, спецыі. Потым я гэта ўсё выкідаю, калі заканчваецца тэрмін прыдатнасці.
Насупраць велізарнага тэлевізара стаіць канапа. Дзмітрый кажа, што любіць тут разам з дзецьмі гуляць у прыстаўку ці проста валяцца, чытаць нейкія кніжкі.
Спявак прызнаецца, што кветкі ў вазонах не адразу змаглі прыжыцца — загінула нямала іх папярэднікаў. У маленькім акварыуме жывуць рыбкі:
— Яны час ад часу адтуль выскокваюць. Відаць, не ад добрага жыцця. Можа, пабачылі па тэліку нейкія рэпартажы пра мора і спрабуюць любой цаной туды трапіць. Часцей цаной свайго жыцця.
Упрыгожвае гасцёўню пано са стабілізаванага моху. Гэта таксама захапленне жонкі Дзмітрыя: нейкія кампазіцыі Вікторыя набыла, а нейкія зрабіла сама.
Дзмітрый расказаў, што яму было важна зрабіць кабінет для сябе, бо часам ён працуе ў Мінску. Большасць песень артыст напісаў менавіта тут.
— У Маскве я бываю часцей, але творчасцю там я амаль не займаюся. Мітусня там нейкая, шуміць усё за акном… А тут, звярніце ўвагу, даволі ціха. За акном рэдкая машына праедзе, нават у працоўны час. З другога боку від на заказнік.
— Раней у нас была студыя гуказапісу ў Маскве ў спартыўным комплексе «Алімпійскі», але яго разбурылі, цяпер будуюць новы. Частка абсталявання пераехала сюды.
Запісвае ў асноўным спявак у хатняй студыі толькі бэк-вакал, бо для запісу асноўнага вакалу непрыстасаваныя сцены.
— Нешта дапісаць, дапрацаваць, дэма зрабіць, памузіцыраваць…
У кабінеце стаіць канапа. Дзмітрый кажа, што час ад часу спіць на ёй.
— На жаль, калі я працую ў Маскве, гэты пакой выкарыстоўваецца як пакой, дзе адбываецца бардак, тут звальваюць нейкія папраныя шмоткі. Гаршкі нейкія сюды прыносяць, скрыні… Прыходзіш сюды і ціха афігеваеш з таго, што гэта вось так можа выкарыстоўвацца.
У кабінеце ў Дзмітрыя ўласная калекцыя сувеніраў, якія ён прывозіў з вандровак — напрыклад, кінжал з Арменіі. Ёсць некалькі лялек у выглядзе самога спевака, якія зрабілі фанаты.
— Вось чэрап барана. Не ведаю чаму, але такія рэчы мне даволі часта дораць. Можа, думаюць, што я сапраўды вядзьмак і мне трэба. У Маскве ў мяне ляжаць страўсіны кіпцюр, воўчы зуб, кіпцюр тыгра.
Сам сабе Дзмітрый прывёз з Хакасіі сапраўдны шаманскі бубен са скуры марала.
Тут жа і калекцыя настольных гульняў — ад пазлаў да «Манаполіі». Прызнаецца, што сям'я не ва ўсе паспела пагуляць.
— Настолкі ў нас закупаюцца пра запас — як і прадукты харчавання. На нейкую светлую будучыню. А можа, гэта адсылка да кавіду, калі мы ўсе сядзелі дома і не ведалі, што рабіць. Пандэмія скончылася, а звычка набываць гульні засталася.
Любімыя настолкі спевака — гэта «Уна» і «Манаполія» (у апошняй яму падабаецца таемна цягаць кэш). Артыст прадэманстраваў калекцыю савецкіх марак — засталася яму яна ад дзеда.
— Раней інтэрнэту не было, вось і збіралі людзі ўсё, — рэзюмаваў спявак і паказаў яшчэ калекцыю юбілейных рублёў.
Упрыгожвае кабінет карціна сяброўкі Дзмітрыя Ірыны Сікачовай, якая пісала яму тэксты для песень (яна ж і хросная маці яго дачкі Алісы).
Дзіцячы пакой дзяўчыны зроблены ў спакойнай бэжава-ружовай гаме. На шпалерах — прыгожыя птушачкі, на люстры таксама.
— Як паказвае практыка, у пакоях дзяўчынак, як потым і ў машынах, значна большы бардак, чым у хлопцаў. У мужчын у машынах значна чысцей. У пакоі Яна значна чысцей.
Пра дачку Дзмітрый расказвае, што яна любіць танчыць і маляваць, а захапляецца кей-попам.
Сыну Яну дастаўся больш вялікі пакой — там ажно два акны. У ім гарманічнае спалучэнне бэжавага, зялёнага ды карычневага колераў.
У хлопчыка шмат канструктараў — тата кажа, што прывозіць сям’я іх з кожнага падарожжа.
На шафе Яна можа пабачыць фуражку — Дзмітрый растлумачыў, што неяк выступаў на Дні памежніка і атрымаў яе ў падарунак. Пад фуражкай стос шалікаў розных футбольных клубаў.
— Калісьці нехта вырашыў, што я аматар футбола. І цяпер мне чамусьці перыядычна дораць шалікі розных мясцовых клубаў.
Сваю з жонкай спальню Дзмітрый вырашыў не паказваць.
На пытанне, дзе ўсё ж падабаецца жыць — у Мінску ці ў Маскве, артыст адказвае:
— У Маскве я больш люблю працаваць. Тут мне больш падабаецца атмасфера спакою, прыроды. Беларусь увогуле прыгожая краіна з густымі лясамі, таму я люблю адпачываць тут на прыродзе. А потым з назапашаным натхненнем, расслабленасцю адпраўляюся ўжо ў Маскву.
«Наша Нiва» — бастыён беларушчыны
ПАДТРЫМАЦЬСпявак Дзмітрый Калдун паказаў сваю мінскую кватэру недалёка ад Драздоў ШМАТ ФОТА16
Каментары
столько явных и скрытых упрёков в адрес супруги, нелепое сравнение комнат девочки и мальчика с порядком в машинах (wtf?), производит впечатление психически неуравновешенного, закомплексованного мужчины
атабарылася. лепш не скажаш)