Дзяржаўная праграма «Лічбавая Беларусь» на 2026—2030 гады прадугледжвае скарачэнне папяровых дакументаў за кошт выкарыстання іх лічбавых версій пры вырашэнні розных жыццёвых і дзелавых пытанняў. Адпаведная пастанова Савета Міністраў №793 ад 30 снежня апублікаваная на Нацыянальным прававым інтэрнэт-партале.
Згодна з дакументам, у найбліжэйшую пяцігодку плануецца распрацаваць і пачаць выкарыстоўваць лічбавыя вобразы шэрагу дакументаў, у тым ліку пашпарта грамадзяніна.
Акрамя яго, у электронны выгляд могуць перавесці:
- пасведчанне кіроўцы;
- страхавое пасведчанне дзяржаўнага сацыяльнага страхавання;
- звесткі з індывідуальнага асабовага рахунку;
- дазвол на часовае пражыванне;
- пасведчанне аб рэгістрацыі транспартнага сродку;
- вайсковы білет;
- пенсійнае пасведчанне;
- дакументы аб нараджэнні, шлюбе, разводзе, устанаўленні бацькоўства ці змене імя;
- пасведчанне інваліда;
- дакументы на нерухомую маёмасць;
- заключэнне медыка-рэабілітацыйнай экспертнай камісіі;
- пасведчанне на права кіравання маламерным суднам.
Канчатковы спіс такіх дакументаў вызначаць дзяржаўныя органы. У 2026 годзе праграму плануюць дапоўніць мерамі па стварэнні або мадэрнізацыі інфармацыйных сістэм, неабходных для фарміравання лічбавых дакументаў.
У выніку грамадзяне павінны атрымаць магчымасць атрымліваць і выкарыстоўваць інфармацыю пра сябе праз мабільныя і вэб-дадаткі, каб хутка вырашаць жыццёвыя і дзелавыя пытанні ў электроннай форме.
Акрамя таго, урад плануе забяспечыць працу з ID-картай праз мабільныя прылады — для ідэнтыфікацыі, аўтэнтыфікацыі і стварэння электроннага лічбавага подпісу, а таксама ўкараненне ідэнтыфікацыі з выкарыстаннем біяметрычных даных і ўнікальнага ідэнтыфікатара карыстальніка.
Цяпер чытаюць
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну66
Каментары