Пасля расійскіх удараў ва Украіне не засталося ніводнай цэлай электрастанцыі
Пасля расійскіх удараў ва Украіне не засталося ніводнай электрастанцыі, якая б не пацярпела. Пра гэта заявіў нядаўна прызначаны на пасаду міністр энергетыкі краіны Дзяніс Шмыгаль.
Паводле слоў Дзяніса Шмыгаля, толькі за мінулы год па энергетычнай інфраструктуры Украіны было нанесена 612 наўмысных камбінаваных удараў, а цяпер атакі адбываюцца амаль штодня. У выніку выведзеныя са строю тысячы мегават магутнасцяў.
Нягледзячы на гэта, энергасістэма Украіны ўсё яшчэ функцыянуе як адзінае цэлае, аднак у краіне дзейнічаюць жорсткія абмежаванні на спажыванне электраэнергіі. Найбольш цяжкая сітуацыя назіраецца ў Кіеве, а таксама ў Адэскай, Днепрапятроўскай, Харкаўскай і іншых прыфрантавых абласцях.
Шмыгаль адзначыў, што Украіна актыўна супрацоўнічае з міжнароднымі партнёрамі, закупляючы генератары, акумулятары, трансфарматары і іншае абсталяванне для аднаўлення. Да рамонтных работ прыцягнута больш за 15 тысяч спецыялістаў, якія працуюць кругласутачна. Акрамя таго, краіна нарошчвае імпарт электраэнергіі з Еўрапейскага Саюза. Паводле міністра, Расія разлічвае зламаць Украіну праз энергетычны тэроp, але ўлады ўсведамляюць маштаб пагроз і рэагуюць аператыўна.
На мінулым тыдні пасля масіраваных абстрэлаў у Кіеве без цяпла і электрычнасці засталіся каля шасці тысяч дамоў — амаль палова шматпавярховага жылля. У ноч на 13 студзеня дэфіцыт электраэнергіі ў сталіцы быў настолькі вострым, што яе не хапала нават для крытычнай інфраструктуры. Па стане на вечар 15 студзеня без святла заставаліся каля 300 дамоў.
Паводле ацэнак Еўрасаюза, калі атакі працягнуцца з такой жа інтэнсіўнасцю, цэлыя левабярэжныя рэгіёны Украіны, дзе да пачатку поўнамаштабнай вайны жыло каля 15 мільёнаў чалавек, могуць цалкам страціць доступ да электраэнергіі. Украінскія энергакампаніі раней заяўлялі, што рэсурсаў для рамонту пашкоджаных станцый практычна не засталося. На гэтым фоне кіраўнік МЗС Украіны Андрэй Сібіга абвясціў пра скліканне так званага «энергетычнага Рамштайна», прысвечанага ўмацаванню энергетычнай інфраструктуры краіны.
Цяпер чытаюць
У Францыі ад спёкі загінуў дальнабойшчык з Докшыцаў10
Каментары