У Мінску жанчына выкінула з дзявятага паверха чыхуахуа свайго каханка
У Мінску вынеслі прысуд 31‑гадовай жанчыне, якую прызналі вінаватай у жорсткім абыходжанні з жывёлай і хуліганстве, паведамляе агенцтва «Мінск-Навіны».
Інцыдэнт адбыўся ўвечары 12 кастрычніка 2025 года. Мужчына вярнуўся з працы ў інтэрнат, дзе жыў разам з маці. Яна ў той час знаходзілася ў вёсцы. У пакоі яго чакала дзяўчына, з якой ён сустракаўся каля года.
На працягу дня яна неаднаразова тэлефанавала яму, правакавала сваркі і паводзіла сябе агрэсіўна. У нейкі момант яна нават прыгразіла выкінуць з балкона яго сабаку — чыхуахуа.
Хлопец не ўспрыняў пагрозы сур’ёзна, бо дзяўчына была п’яная. Аднак калі ён зайшоў у пакой, сабака яго не сустрэў. Пошукі нічога не далі, а дзяўчына з насмешкай спыталася, ці не злавіў ён жывёліну. Тады стала зразумела, што сабаку выкінулі з дзявятага паверха.
Пасля гэтага жанчына пачала выкідаць з акна рэчы, якія належалі хлопцу і яго маці. Узрушаны мужчына патэлефанаваў маці і папрасіў выклікаць міліцыю. Пазней вахцёрка інтэрната пацвердзіла, што сабака загінуў.
У судзе жанчына цалкам прызнала сваю віну і раскаялася, аднак не змагла растлумачыць матывы свайго ўчынку. Суд прызнаў яе вінаватай у хуліганстве і жорсткім абыходжанні з жывёлай.
Жанчыне прызначылі паўтара года абмежавання волі без накіравання ў папраўчую ўстанову («хатняя хімія»), абавязалі прайсці прымусовае лячэнне ад хранічнага алкагалізму і выплаціць 500 рублёў у якасці кампенсацыі маральнай шкоды.
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі4
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары
Сваім прынцыпам вярна
З усёй гісторыі шкада сабачку