Круіз на цеплаходзе «Белая Русь» па рэках Палесся каштуе як адпачынак у Турцыі. Але каюты на вясну-лета амаль выкупленыя

У першы круіз цеплаход «Белая Русь» адправіцца сёлета 11 красавіка па маршруце Брэст — Кобрын — Дубае — Пінск — Стахава — Тураў — Ляскавічы — Навасёлкі — Нароўля — Мазыр. Гэты маршрут называецца «Зачараванне Палесся — 1» (існуюць і іншыя варыянты) і працягнецца 8 дзён.

Турыстычная праграма наступная: пачынаецца ўсё з экскурсіі па Брэсцкай крэпасці, на наступны дзень запланавана наведванне ваенна-гістарычнага музея імя Суворава ў Кобрыне. Ёсць яшчэ музей Дзеда Талаша. З невайсковых музеяў прапаноўваюць музей прыроды ў Ляскавічах і краязнаўчы музей «Замкавая Гара» ў Мазыры.

У астатнія дні гасцей вязуць на прадпрыемствы (напрыклад, на малаказавод у Тураве — там абяцаюць паказаць «сырную Італію ў цэнтры Палесся») ці па крамах (у Нароўлі гэта фірмовая крама «Чырвоны Мазыранін»).

У завяршэнні круізу адбудзецца гала-вячэра на борце цеплахода. Гасцей нават просяць прытрымлівацца дрэс-коду: для мужчын гэта касцюм з гальштукам, а для жанчын — вячэрняя сукенка.

Цэны за чалавека ў гэтым круізе пачыналіся ад 2872 рублёў. І ўсе месцы ўжо раскуплены. Круіз па беларускіх рэках актыўна прадаюць расійскія тураператары — праз іх сайты, дарэчы, усе каюты ўжо зарэзерваваныя ажно да чэрвеня.

Павялічыць

Чытачка «Нашай Нівы» звярнулася ў беларускую турфірму, якая таксама прадае туры на цеплаход «Белая Русь». Там адзначылі, што даволі позна займацца браніраваннем — трэба было рабіць гэта яшчэ летась восенню. Бо сёння тым, хто вандруе парай, могуць прапанаваць у чэрвені толькі адзін варыянт: вольная адна двухмесная каюта — каштуе яна 3180 рублёў за чалавека.

А за аднамесную эканом-каюту на ліпень з маленькім ілюмінатарам замест акна просяць ужо 3868 рублёў. Люкс для двух чалавек абыдзецца прыблізна 14 200 рублёў — гэта амаль што $5000 у эквіваленце, супастаўна з адпачынкам у любімай беларусамі Турцыі.

Павялічыць

Для параўнання: летась за люкс на «Белай Русі» прасілі 13 730 рублёў за дваіх.

У кошт круізу па Беларусі ўваходзіць чатырохразовае харчаванне па сістэме «ўсё ўключана» (сняданак, абед, піццё гарбаты днём і вячэра) і алкагольныя напоі. Але калі летась гасцям прапаноўвалі не толькі айчынны, але і замежны алкаголь, то сёлета пакінулі толькі беларускі.

Павялічыць

Даплачваць за экскурсіі на маршруце не трэба.

Усяго на сезон 2026 года запланавана 27 круізаў — апошні стартуе 10 кастрычніка.

Нагадаем: «Белая Русь» — першы і адзіны круізны цеплаход у Беларусі. Ён быў пабудаваны ў 2016 годзе на суднабудаўнічым заводзе ў Пінску. Прызначаны для круізаў па рэках Палесся, уключаючы Дняпроўска-Бугскі канал, Мухавец, Піну і Прыпяць.

Даўжыня судна 50 метраў, шырыня 7 метраў. Тут ёсць 16 кают розных катэгорый — ад эканом да люкс. Дарэчы, люксы названы ў гонар Янкі Купалы і Якуба Коласа.

• 2
• 0
• 4
• 2
• 3
• 2
• 0
• 0