Гісторык Аляксандр Смалянчук уганараваны сумеснай прэміяй дзвюх польска-літоўскіх арганізацый
Прэміяй за заслугі ў галіне гісторыі і захавання гістарычнай памяці, заснаванай Форумам супрацоўніцтва і дыялогу Польшча — Літва і польска-літоўскага Форуму дыялогу і супрацоўніцтва імя Ежы Гедройця ўганараваны беларускі гісторык прафесар Аляксандр Смалянчук, паведамляе «Позірк».
У сваім выступе на ўрачыстай цырымоніі ўручэння прэміі ў музеі «Каралеўскія Лазенкі» ў Варшаве Смалянчук адзначыў, што трактуе атрыманую ім узнагароду як «прызнанне працы ўсіх беларускіх гісторыкаў, вымушаных пакінуць сваю краіну, у якой цяпер няма свабоды навуковых даследаванняў у галіне гуманітарных і грамадскіх навук, а іх удзельнікам пагражаюць рэпрэсіі».
На цырымоніі выступіў намеснік кіраўніцы Аб’яднанага пераходнага кабінета Павел Латушка. Ён адзначыў, што сёлета прэмія ўпершыню «пашыраная на прадстаўнікоў дэмакратычнай Беларусі».
«Ваша праца па вяртанні праўдзівай гісторыі — падмурак нашай годнасці. Ваша ўзнагарода — знак таго, што Беларусь — Еўропа, і Еўропа гэта прызнае, не жадаючы новай «жалезнай заслоны» па лініі Буга», — адзначыў Латушка, звяртаючыся да лаўрэата.
Смалянчук — доктар гістарычных навук, прафесар. Даследуе агульную гісторыю Беларусі, Літвы і Польшчы. Працуе ў Інстытуце славістыкі Польскай акадэміі навук.
Цырымонія ўручэння прэмій форуму супрацоўніцтва і дыялогу Польшча — Літва і Форуму дыялогу і супрацоўніцтва імя Ежы Гедройця з’яўляецца адным з найважнейшых мерапрыемстваў, прысвечаных пабудове дыялогу, узаемаразумення і супрацоўніцтва паміж Польшчай і Літвой, а таксама народамі Цэнтральнай і Усходняй Еўропы.
Каментары