Рада Еўрапейскага Саюза 26 лютага падоўжыла санкцыі супраць Беларусі яшчэ на адзін год. Пра гэта паведаміла Міністэрства замежных спраў Літвы.
Адзначаецца, што абмежавальныя меры супраць Беларусі застаюцца ў тым жа аб’ёме і без змен. Паводле літоўскага боку, санкцыі звязаныя з унутранымі рэпрэсіямі ў Беларусі, падтрымкай Расіі ў вайне супраць Украіны, а таксама з гібрыднымі дзеяннямі супраць краін Еўрасаюза.
Міністр замежных спраў Літвы Кястуціс Будрыс заявіў, што ў Беларусі працягваецца пераслед грамадзянскай супольнасці, утрыманне людзей у зняволенні па палітычных матывах, а таксама фіксуюцца новыя гібрыдныя атакі. Ён таксама адзначыў выкарыстанне беларускай тэрыторыі ў вайсковых мэтах. Паводле яго слоў, краіны ЕС захоўваюць адзіную пазіцыю адносна неабходнасці працягваць ціск.
Згодна з інфармацыяй МЗС Літвы, пад санкцыямі ЕС цяпер знаходзяцца 312 грамадзян Беларусі і 57 юрыдычных асоб. Іх актывы ў Еўрасаюзе замарожаныя, грамадзянам і кампаніям ЕС забаронена праводзіць з імі фінансавыя аперацыі, а фізічным асобам з санкцыйнага спісу — уезд на тэрыторыю ЕС. Эканамічныя абмежаванні закранаюць фінансавы, гандлёвы, энергетычны, транспартны і іншыя сектары.
Пастанова будзе дзейнічаць да 28 лютага 2027 года з магчымасцю наступнага падаўжэння.
Цяпер чытаюць
Чацвёра дзяцей-футбалістаў з Рэчыцы параненыя ў Бранскай вобласці — іх везлі ў Геленджык, калі ў аўтобус трапіў беспілотнік6
Каментары