У Вярхоўным судзе Беларусі 9 красавіка прайшло пасяджэнне па разглядзе скаргі грэка-каталіцкай парафіі ў Брэсце на рашэнне Брэсцкага абласнога суда аб ліквідацыі парафіі. На жаль, скаргу не задаволілі — прынята канчатковае рашэнне аб пазбаўленні супольнасці рэгістрацыі як рэлігійнай арганізацыі, піша Katolik.life.
Пра гэта даведаліся вернікі, але ні структуры Каталіцкай царквы, ні дзяржаўныя органы не паведамлялі пра ліквідацыю парафіі Святых Братоў Апосталаў Пятра і Андрэя ў Брэсце.
Больш за тое, рашэннем мясцовых уладаў была ліквідаваная таксама грэка-каталіцкая парафія Святых Кірылы і Мяфодзія ў Баранавічах. Разам з парафіяй у Івацэвічах, якая раней не прайшла перарэгістрацыю, агулам ліквідаваныя ўсе тры рэлігійныя арганізацыі грэка-каталікоў (уніятаў) у Брэсцкай вобласці.
Сітуацыя супольнасцяў у Брэсце і Баранавічах асаблівая. Калі парафія ў Івацэвічах, як і многія рыма-каталіцкія супольнасці, не прайшла перарэгістрацыю ў 2025 годзе і падала заяву аб ліквідацыі арганізацыі, то ў гэтым выпадку працэс ліквідацыі адбываўся праз суд.
Падрабязнасці вернікам не вядомыя. Але выглядае так, што супольнасці былі нязгодныя з ліквідацыяй, таму такія рашэнні прынялі мясцовыя ўлады, а вернікі абскарджвалі гэтыя рашэнні ў судзе.
Дакладная афіцыйная прычына ліквідацыі невядомая, аднак у адным з рашэнняў вернікі заўважылі фармулёўку пра быццам бы «пагрозу нацыянальным інтарэсам».
Скаргу падавала і парафія ў Баранавічах, але вынік вернікам невядомы — хутчэй за ўсё, таксама была атрыманая адмова. Цяпер супольнасць удзельнічае ў рыма-каталіцкіх імшах у касцёле.
Пасля ліквідацыі арганізацый грэка-католікі не могуць арганізоўваць службы ў візантыйскім абрадзе і збірацца самастойна на малітву ў сваіх храмах. Пытанне з маёмасцю парафій пакуль вырашаецца — верагодна, давядзецца рэгістраваць будынкі храмаў на прыватных асобаў.
Наколькі вядома вернікам, грэка-каталікі Брэсцкай вобласці спадзяюцца, што будзе дасягнута дамоўленасць служыць літургіі ў візантыйскім абрадзе ў мясцовых каталіцкіх храмах. І не страчваюць надзею, што ў будучыні змогуць наноў зарэгістраваць парафіі.
Адметна, што такія працэсы адбыліся пры новым Апостальскім нунцыю (дыпламатычным прадстаўніку) Ватыкана ў Беларусі арцыбіскупе Іньяцыё Чэфаліа (на галоўным фота), які сам з'яўляецца грэка-католікам — святаром візантыйскага абраду Італа-албанскай Каталіцкай царквы.
У Магілёўскай вобласці пасля перарэгістрацыі знікла палова каталіцкіх парафій
У канцы XVIII стагоддзя грэка-каталіцтва ў Беларусі спрабавала плаўна перацячы ў лацінства
Першымі беларусамі, якія сустрэліся з новым Папам, стала дэлегацыя грэка-католікаў
«Бог даў вам усё, акрамя майго нумара тэлефона»: святар-уніят з Віцебска стаў зоркай сацсетак
Каментары
[Зрэдагавана]