Бізнэс-лэдзі і блогерка Вольга Глеб закрыла перадапошнюю краму свайго брэнду адзення, а цяпер пачынае распрадаваць вытворчасць

Крама Moshe у гандлёвым цэнтры Trend Park, якая працавала там шэсць гадоў, афіцыйна зачынілася 1 красавіка. У выніку афлайн-крама ў Вольгі засталася адна — у Green City.

Цяпер жа жонка былога футбаліста Вячаслава Глеба абвясціла ў Threads, што прыняла шэраг важных рашэнняў па брэндзе. Адно з іх — продаж вытворчасці.

Яна апублікавала абвестку: «Усяго 16 машын, нажніцы для раскройнага цэха, абсталяванне ВТА, плотэр для друку лекалаў. Вялікі раскройны стол. Таксама два сталы для камп’ютараў і дакументаў. Стэлажы, вешалкі. Усё ёсць. Прыходзьце і працуйце». І само памяшканне плошчай 150 квадратаў.

Усё гэта Вольга прадае за дзесяць тысяч даляраў. Таксама асобна можна набыць рэшткі тканіны. У бізнэс-лэдзі спыталі, ці значыць гэта, што яна закрывае брэнд Moshe ці што цяпер будзе адшываць усё ў Кітаі. Яна адказала лаканічна: «Не. Не».

Павялічыць

Раней блогерка распавядала падпісчыкам пра галоўныя складанасці, з якімі яна як стваральніца брэнда сутыкаецца. І першае — гэта высокія цэны на арэнду ў сталічных гандлёвых цэнтрах. Кажа, мінімальная стаўка — 10 тысяч рублёў штомесяц.

З вытворчасцю таксама ўсё было не вельмі проста. Бо людзей, якія шыюць для вас, неабходна забяспечваць працай, нават калі і так зашмат тавару: «І далей вас чакае затаварванне».

Пры гэтым кліенткам будзе заўсёды чагосьці не хапаць: «Нават калі вы прапануеце чатыры колеры адной мадэлі, кліенты абавязкова спытаюць: «А якія колеры будуць яшчэ?» Але таго, які яны хочуць, у вас, вядома ж, не будзе».

Павялічыць

Ды і знайсці персанал, аказваецца, задача з зорачкай. Вольга паскардзілася, што за дзесяць гадоў працы ў яе было толькі пяць сапраўды прафесійных кансультантак. Дарэчы, людзі ў каментарах гэта пацвердзілі гісторыямі пра тое, як заходзілі ў Moshe, а дзяўчына-кансультантка нават не спыняла сваю тэлефонную размову.

Але ж і да бізнэс-лэдзі ўзнікалі пытанні па зарплаце. Яна неяк спытала ў Threads, ці нармальную прапаную аплату для падпрацоўкі — 178 рублёў за два дні працы кансультанткай у краме.

Большасць каментатараў сышліся на тым, што за 12 гадзін працы штодзень — гэта недастаткова. Бо пры графіку два дні праз два дні рэальна зарабіць усяго толькі 1400 рублёў за месяц.

Вольга Глеб прызнаецца, што захапляецца пачаткоўцамі, якія запускаюць уласныя брэнды ў сучасных умовах. Дарэчы, летась такі стварылі яе сваячкі — Святлана Глеб разам з дачкой Настассяй запусцілі Le Chik.

І ўжо паспелі трапіць у цікавую сітуацыю. На адным з кітайскіх сайтаў знайшоўся такі самы касцюм, як у Le Chik. Святлана Глеб заявіла, што гэта кітайцы скапіравалі іх дызайн.

Павялічыць

• 0
• 0
• 5
• 1
• 4
• 0
• 0
• 1