У Мінскім заапарку практычна завершана будаўніцтва вальеры для леапардаў. Як паведаміла намеснік дырэктара заапарку Наталля Лебедзева, засталіся апошнія штрыхі — нацягнуць верхняе сеткавае пакрыццё.
Збор грошай на будаўніцтва вальеры для пары далёкаўсходніх леапардаў — Леды і Лео — быў аб’яўлены яшчэ ў 2007 годзе. Удалося сабраць амаль 40 млн. рублёў — гэта сродкі спонсара, прадпрыемства «Ікартайм» (гандлёвая марка «Матадор»), і ахвяраванні прыватных асоб. Само будаўніцтва вялося прыкладна год.
Вальера плошчай больш за 60 квадратных метраў будавалася для таго, каб максімальна наблізіць умовы жыцця леапардаў да натуральнага асяроддзя, у якім яны больш актыўна размнажаюцца. Аднак у працэсе будаўніцтва памерла ад хваробы Леда. Як адзначаюць у заапарку, знайсці Лео пару будзе няпроста — попыт на леапардаў вельмі высокі.
Тым не менш работнікі заапарку спадзяюцца адшукаць Лео новую сяброўку. Калі іх планы ўвянчаюцца поспехам, Мінскі заапарк мае намер займацца развядзеннем далёкаўсходніх леапардаў, прадаючы дзіцянят у іншыя заапаркі для далейшага павелічэння папуляцыі.
Далёкаўсходнія леапарды занесены ў міжнародную Чырвоную Кнігу. Паводле падлікаў спецыялістаў, у дзікай прыродзе іх засталося не больш за тры дзесяткі. На волі леапарды жывуць прыблізна 20 гадоў, сярэдні рэпрадуктыўны ўзрост складае да 15 гадоў.
Паводле інфармацыі Наталлі Лебедзевай,
сёння ў Мінскім заапарку налічваецца 285 разнавіднасцяў жывёл. Сёлета нарадзіліся дзіцяняты ў стэпавага арла, філіна, насухі, малпы (гамадрыла) і іншых жывёл. Акрамя таго, у 2010 годзе ў заапарку з’явілася пяць горных вінтарогіх казлоў
— падарунак калег з Талінскага заапарку (Эстонія).
У Мінскага заапарку — вялікія планы. У прыватнасці, павінны з’явіцца новыя экспазіцыі: акварыумы, тэрарыумы, комплекс вальераў для жывёл сямейства каціных. Для рэалізацыі запланаванага адміністрацыя займаецца пошукам спонсараў.
Каментары