У Віцебскай вобласці ўпаў баявы дрон, яго ў той жа дзень падарвалі на месцы
Як стала вядома «Нашай Ніве» з дзвюх крыніц, 17 мая на тэрыторыі Беларусі ўпаў баявы дрон. Ён не ўзарваўся сам, сілавікі падарвалі яго на месцы. Гэта здарылася на поўдзень ад Глыбокага.
Афіцыйныя структуры пра інцыдэнт не паведамлялі.
Гэта ўжо не першы выпадак залёту і падзення ў Беларусі баявых дронаў. У сувязі з закрытасцю інфармацыі невядома, дрон якой краіны заляцеў у Беларусь на гэты раз.
Расія выкарыстоўвала паветраную прастору Беларусі для атак па Украіне.
Украінцы змагаюцца з атакамі дронаў па-рознаму, у тым ліку электронна, у выніку чаго расійскія дроны часам вар'яцеюць і адвольна мяняюць траекторыю, часам аказваючыся ў Беларусі.
Аналагічныя захады прымяняюць і расіяне.
Учора адзін украінскі дрон з выбухоўкай заляцеў у Літву. Ён быў знойдзены ў горадзе Уцяна на паўночным усходзе краіны, прыкладна за 40 км ад меж Латвіі і Беларусі. Раней збітыя з курсу ўкраінскія дроны апыналіся ў Літве, Латвіі, Эстоніі і нават Фінляндыі.
Абмены ракетна-дронавымі ўдарамі між Расіяй і Украінай дасягнулі вялікай інтэнсіўнасці. Некаторыя дні над адной і другой краінамі збіваюць да тысячы дальнабойных беспілотнікаў.
Расія і рэжым Аляксандра Лукашэнкі ў 2022 годзе разлічвалі захапіць Кіеў за тры-чатыры дні. Аднак бліцкрыг не ўдаўся. Вайна працягваецца ўжо пяты год. Пасля таго як стала зразумела, што яна зацягваецца, расійскія войскі выйшлі з беларускай тэрыторыі, але беларускі ВПК працягвае працаваць на патрэбы расійскай арміі.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1212
Каментары