Больш чым па 20 гадоў зняволення кожнаму. Вынеслі прысуд па рэзананснай справе сям'і Ліпскіх

Паводле версіі следства, сужэнцы планавалі расправы над людзьмі, якіх лічылі датычнымі да крымінальнай справы свайго сына Аляксандра. Для гэтага, як сцвярджаецца, яны сачылі за патэнцыйнымі ахвярамі, набывалі зброю і рыхтаваліся да ўчынення злачынстваў.

Коратка нагадаем гісторыю Ліпскіх: сям'я жыла ў двухпакаёўцы на праспекце Ракасоўскага. У Мінск яны пераехалі са Светлагорска, калі іх адзіны сын Саша вучыўся яшчэ ў школе. Спачатку яны нармальна ладзілі з усімі, але пасля сталі канфліктаваць з суседзямі і збіраць пра іх інфармацыю.

Ключавыя падзеі, пасля якіх Ліпскія сталі складаць свой «расстрэльны спіс», адбыліся ў канцы 2018 года, калі Аляксандр напаў на суседа з пад'езда Аляксея (імя зменена) і зламаў яму палец. У момант канфлікту побач была Раіса Ліпская.

Павялічыць

Па гэтым факце ў адносінах да Аляксандра Ліпскага была заведзена крымінальная справа. Суд прызначыў яму пакаранне ў выглядзе абмежавання волі (4 гады «хіміі»), аднак неўзабаве той схаваўся. Следам за ім знікла і ягоная маці. Бацька Ліпскага працягваў працаваць і сцвярджаў, што не бачыў сына з 2018 года, а жонку — з 2020-га. Як пасля ўдалося ўстанавіць следчым, ён таксама ўдзельнічаў у дбайным планаванні забойстваў.

У лістападзе 2021 года Аляксандр Ліпскі, знаходзячыся ў вышуку, прыйшоў дадому да роднай сястры жонкі Аляксея — 33‑гадовай Марыі (імя зменена) і застрэліў яе. Жанчына ў той момант збіралася ў дзіцячы садок па маленькую дачку, а яе муж, ратуючыся ад злачынцы, выскачыў з балкона пятага паверха і выжыў.

Да моманту затрымання Ліпскіх у жніўні 2024 года сям'я Аляксея вымушана была змяніць кватэру і жыць у пастаянным напружанні, асцерагаючыся за жыццё блізкіх. Аказалася, не дарэмна: увесь гэты час Ліпскія, як даведаецца следства, рыхтаваліся да забойства некалькіх дзясяткаў чалавек. У спіс увайшлі ўсе, хто меў дачыненне да судовага працэсу 2019 года. Па даных следства, Ліпскія лічылі, што такім чынам суды сапсавалі жыццё іх сыну.

У жніўні 2024 года сям'я Ліпскіх была затрымана. Пры затрыманні сын Аляксандр быў смяротна паранены. У кватэры, дзе хавалася сям'я, знайшлі арсенал зброі: пісталеты, патроны, глушыцелі, самаробныя гранаты і боепрыпасы. Па даных следства, «для рэалізацыі планаў сям'я Ліпскіх выкарыстоўвала канспірацыю: парыкі, кіі, змену адзення на вуліцы».

У лістападзе 2025 года крымінальная справа ў дачыненні да мужа і жонкі Ліпскіх, абвінавачаных у падрыхтоўцы серыі забойстваў, была накіравана ў суд.

Судовы разгляд доўжыўся больш за чатыры месяцы. У выніку суд прызначыў Уладзіміру Ліпскаму 24 гады пазбаўлення волі ў калоніі ўзмоцненага рэжыму, а Раісе Ліпскай — 22 гады пазбаўлення волі ў калоніі агульнага рэжыму.

• 5
• 0
• 0
• 0
• 2
• 0
• 0
• 0