Пасля паляпшэння стану 80‑гадоваму іерарху зрабілі новую аперацыю на сэрцы.
Арцыбіскуп-эмерыт Тадэвуш Кандрусевіч пасля працяглага знаходжання ў бальніцы ў Мінску з-за праблем з сэрцам выпісаны з лячэбнай установы, піша katolik.life.
Заслужанага іерарха давялося шпіталізаваць пасля пагаршэння самаадчування.
Сітуацыя была сур'ёзнай, але дактары своечасова выявілі сардэчную недастатковасць і прадухілілі новы інфаркт (раней арцыбіскуп ужо перанёс інфаркт).
Пасля паляпшэння стану 80‑гадоваму іерарху зрабілі аперацыю на сэрцы: усталявалі новыя стэнты і прачысцілі старыя. Гэта нескладаная працэдура на сасудах сэрца, але ў ягоным узросце яна магла несці пэўную небяспеку. Аднак іерарх, за якога вернікі працягваюць маліцца, паспяхова перанёс аперацыю.
Цяпер ён знаходзіцца на рэабілітацыі.
Акрамя праблем з сэрцам заслужаны іерарх мае анкалагічнае захворванне, з рэцыдывам якога змагаецца ўжо амаль паўтара года.
Каментары