Канстанцін Каверын расказаў, як на радыё яму прыдумалі псеўданім і якое яго сапраўднае прозвішча
Вядоўца ранішняга шоу «Обычное утро» Канстанцін Каверын у новым выпуску ТОКу расказаў, адкуль узяўся яго псеўданім, хто яго прыдумаў і ці падабаецца ён самому Канстанціну.
Падчас размовы з вядоўцам «Обычного утра» Настасся Роўда звярнула ўвагу, што Каверын — не сапраўднае ягонае прозвішча, і пацікавілася абставінамі, пры якіх Канстанцін Місуна стаў Каверыным.
«Гэта не я вырашыў. Гэта было вырашана на радыё «Юністар» Ігарам Сукманавым, нашым цудоўным тагачасным праграмным дырэктарам», — расказаў Каверын.
Паводле слоў Канстанціна, кінакрытык і шматгадовы праграмны дырэктар кінафестывалю «Лістапад» адыграў «велізарную ролю» ў яго жыцці.
Як згадвае Канстанцін, Сукманаў прыдумаў для яго псеўданім перад першым выхадам маладога вядоўцы ў эфір на «Юністар».
«Ён сказаў, што [Місуна] не пойдзе, не пасуе, трэба нешта такое прыдумаць. Ён узяў і прыдумаў. Чамусьці Каверын. Усе радасна папляскалі і сказалі: «Так-так, вось ён Каверын».
На пытанне Настассі, ці спадабаўся яму новы псеўданім, Канстанцін адказаў, што не.
«Але ты права голасу не меў?» — удакладніла з усмешкай вядоўца.
«Так, там было цяжкавата з гэтым», — адказаў Канстанцін.
Пры гэтым, як прызнаўся вядоўца, сапраўднае прозвішча яму таксама не падабаецца.
«Наогул жыць Канстанцінам Місунам вельмі няпроста, я табе скажу. Мне не падабаюцца ні маё імя, ні прозвішча», — заўважыў Канстанцін.
Ён дадаў, што збоку розніца паміж прозвішчамі можа падавацца неістотнай:
«Вам жа гэтага не зразумець. (…) Вам збоку ўсё роўна: Каверын, Місуна… Ну ёсць нейкі — і ёсць. Мне не падабаецца. Я б лепш быў Грынбергам. Так, мне падабаецца прозвішча Грынберг. Не ведаю чым».
(«Місуна» — беларускае прозвішча балта-славянскага паходжання, частае на беларускім Паазер'і, ад імені ўласнага Міхась — у даўніну яго скарачалі, ласкава ці нефармальна, гутаркова, да Місь, Місюня, Місуна. Літоўскі варыянт таго ж прозвішча — Місунас, Місюнас. Параўнайце з іншымі падобнымі прозвішчамі з беларуска-літоўскага памежжа: Аляксюн, Шакун, Петрашун, Аляксюнас, Петрашунец, Пятрашунас — НН.)
Каментары