«Ляпіс», Моцарт і шансон

«Музыка на кампакт-дысках аджыла сваю эпоху» — колькі разоў за пошнія пару гадоў даводзілася чуць гэтую фразу. Ну, скажам шчыра, дзе як.

«Наша Ніва» высветліла, якую музыку беларусы гатовыя купляць на кампактах.

Моцарт на ТОПе

Прадаўцы здзіўляюцца, але класіка ідзе вельмі добра. Асабліва Моцарт — продажы Моцарта выглядаюць лепш, чым па сучаснай замежнай музыцы. Не дарма музыкаведы называюць яго геніем поп-музыкі. Ягоныя мелодыі дагэтуль трымаюцца ў спісах найпапулярнейшых рынгтонаў для мабільных тэлефонаў. У свой час музыка Моцарта выконвала тую ж ролю, якая цяпер належыць лідарам продажаў часопіса Billboard. І вось што характэрна: прайшло сорак гадоў і, напрыклад, Ніла Дайманда памятаюць толькі знаўцы і аматары, а Моцарт папулярнасці не страціў і набывае ўсё новых і новых аматараў — геній ён геній і ёсць. Разам з Моцартам добра прадаюцца Шапэн і Бетховен, а таксама Вівальдзі. Больш складаная для ўспрымання акадэмічная музыка — кшталту Стравінскага і Рахманінава, ад Моцарта адстае, а пра кампазітараў кшталту Джона Кэйджа сціпла прамаўчым.

Купляюць беларускае.

Беларускія выканаўцы — у топе. Не гледзячы на тое, што «Ляпіс Трубяцкой» выкладвае свае альбомы ў вольны доступ у Інтэрнэце, попыт на «Вясёлыя карцінкі» (іх апошні альбом) — стабільна высокі. Добра прадаюцца і папярэднія — уся антыглабалісцкая трылогія. Трымаюцца ў топе і «ДзеціДзяцей» з беларускамоўным альбомам «Рух» — прычым абыходзяць па папулярнасці навінкі. Добра прадаецца новы J: Морс — альбом «Электричество» яшчэ раз даказаў, што цягацца з «Ляпісам» па папулярнасці могуць толькі яны, асабліва на фоне таго, што большасць «старой гвардыі» выпускае альбомы далёка не кожны год.

«Нейра Дзюбель» таксама ўваходзіць у чацвёрку лідараў з альбомам «Афтары правды», што пры ўсеагульнай любові да калектыву выглядае абсалютна лагічным, адзінае што слухаць Кулінковіча і кампанію пажадана на сцэне.

Расія — царства шансону

Самыя прадказальныя вынікі — хіты продажаў расійскіх выканаўцаў. Тут лідараў трое, і ў бліжэйшы час нішто не зменіць гэтую сітуацыю. Алена Ваенга, Стас Міхайлаў і Грыгорый Лепс. Калі апошні трошкі здаў свае пазіцыі, то Ваенга з Міхайлавым ідуць, што называецца, «нос да носу». Проста шкада, што букмекеры не бяруць стаўкі на папулярнасць таго ці іншага музыканта: сачыць як Ваенга і Міхайлаў спаборнічаюць у продажах, ратацыях і эфірах — гэта магло б зацікавіць азартных людзей, нават тых, хто музыкай у прынцыпе не цікавіцца. Іх творчасць займае цэлыя паліцы дыскарняў. Усё ж такі жанр «рускага шансону» (хай і той, што называецца з «людскім тварам») застаецца асноўным на адной шостай частцы сушы. Ну, прынамсі, не гурт «Бутырка», што ўжо радасна. Асобна прадаўцы дыскарняў кажуць пра вялікую папулярнасць супольнага праекта Лары Фабіян і Ігара Крутога, але да якой музыкі расійскай ці заходняй іх адносіць — не зразумела.

Lady Gaga і астатнія

А вось заходнія ці, як пішуць у нашых дыскарнях «замежныя», выканаўцы прадаюцца не вельмі. Тут быццам бы і спрацоўвае асветніцкая функцыя Інтэрнэта: усе новыя альбомы ў сеціве можна спампаваць яшчэ за месяц да афіцыйнага рэлізу.

У дыскарнях лідарам з’яўляецца Lady Gaga, што цяпер — сусветная тэндэнцыя.

Адразу за ёй ідзе Джасцін Бібер.

Гэтыя музыканты ўжо захапілі сусветныя музычныя чарты і тэлеканалы і не выглядае на тое, каб у бліжэйшы час яны каму-небудзь саступілі медыяпрастору.

Добра прадаюцца старыя альбомы Мадоны, магчыма, людзі ўзгадалі, што Lady Gaga трошкі ім кагосьці нагадвае. Ізноў жа Лара Фабіян — якая разам з Крутым захапіла паліцы з замежнымі выканаўцамі.

Трымаецца папулярнасць гурту Океан Ельзи, але ўжо ў меншай ступені, чым раней. Карыстаецца попытам альбом Браяна Фэры Olympia, і дзве апошнія пласцінкі Шакіры (наўрад ці гэта залежыць ад яе прыезду). У астатнім — ніякага ажыятажу вакол заходняй музыкі няма, ні вакол навінак, ні вакол перавыданняў.

• 0
• 0
• 0
• 0
• 0
• 0
• 0
• 0