Лідар руху «Вольная Беларусь» рэзка выказаўся адносна актуальнай стратэгіі дэмакратычных сіл і параіў, што трэба рабіць.
«Еўрасаюз, асабліва Нямеччына, праводзяць паслядоўную палітыку па знішчэнні Беларусі. Шляхам эканамічных санкцый, адмаўлення ўсялякіх кантактаў з дыктатарам. Нават улічваючы неабходнасць гуманістычных кантактаў каб вызваліць ад смерці людзей, якія ў турмах»,
— заявіў Зянон Пазняк у інтэрв'ю ютуб-каналу «Пара!»
Па словах лідара руху «Вольная Беларусь», усе палітвязні — закладнікі Лукашэнкі, уладу якога «нічым зараз пахіснуць нельга». Таму трэба гэтых людзей ратаваць гуманістычным метадам — «уступаць з тэрарыстам у перамовы».
«Першае — гэта вызваліць, другое — спыніць рэпрэсіі. Таму што гэта ўзаемазвязана. [Іначай] калі вызваліць, [то] ён будзе зноў папаўняць», — ставіць задачы Пазняк.
Па словах палітыка, для гэтага ёсць усе магчымасці, тым больш сам Лукашэнка дае знакі, што ён гэтага хацеў бы.
«Трэба прыняць гэты знак тэрарыста. Іначай гэтыя людзі будуць знішчаныя», — заклікае Пазняк.
Эканамічныя санкцыі супраць Беларусі ён лічыць непатрэбнымі і шкоднымі для краіны, бо яны прывялі да залежнасці эканомікі краіны ад Расіі і працы на вайну.
«Гэтыя санкцыі накіраваныя толькі на знішчэнне нашай дзяржавы. Уявіце — рухне пуцінскі рэжым, а гэта безумоўна, будзе новая сітуацыя. Расія, магчыма, застанецца, (…) і тады незалежная Беларусь уся прывязана да расійскіх рэсурсаў, да Расіі», — прагназуе палітык і называе вінаватых:
«Усе гэтыя паны шольцы і іншыя, яны цудоўна ведаюць, што робяць. Яны цудоўна ведаюць, што такое санкцыі супраць Беларусі. Яны робяць гэтую палітыку, а падтрымку гэтай палітыкі робяць вось гэтыя офісы.
Найбольш шкодны — гэта Латушка. Таму што Святлана Ціханоўская… Ну яе возяць, яна там гаворыць, усміхаецца, цісне ручку, у яе такая цудовая роля. А гэтыя паслядоўна, паслядоўна: «Санкцыі, санкцыі, душыць, душыць». Каго вы душыце? Сваю дзяржаву, свой народ».
«Калі вы дэкларуеце сябе сябрамі беларускай дэмакратыі і правоў чалавека, то памажыце народу выбрацца з турмы. Уступайце ў кантакт з тэрарыстам. (…)
Стаўце свае ўмовы аб спыненні рэпрэсій і гэтак далей. Ён будзе патрабаваць зняць санкцыі. Здыміце санкцыі. І першае, з каго трэба зняць санкцыі, — з «Белавіі». Гэта карысна для ўсяго народа», — заклікае Пазняк.
Каментары